EDITORYAL - Kuwang pa ang ‘Fallen 44’

Usa sa mga lider sa Moro Islamic Liberation Front (MILF) ang mipadayag o matawag siguro nga mibahad  dihang siya miingon nga  nagpabilin silang usa ka rebolusyonaryong pundok hangtud nga dili mapasar ang Bangsamoro Basic Law.

Ang gipasabot ba ni Mohaqher Iqbal nga bisan unsang orasa awtomatiko silang mosibog sa sabot sa kalinaw ug mobalik na usab kita sa giyera?

Di ba kaha kini pagpahinumdom sa MILF nga duna silay politikanhong tumong mao nga buot g’yud nila nga mapasar ang BBL.

Mabasa sa mga pamahayag sa MILF leaders ug bisan na sa government negotiating panel nga “macro-perspective” ang ilang pagtan-aw sa sitwasyon ug dili nila gusto nga maapektahan ang BBL  tungod sa nahitabo sa Mamasapano.

Ang ‘national security’ sa nasud, kalamboan sa Mindanao, maayong imahen sa Pilipinas sa mata sa international community ug labaw sa tanan, ang malungtarong kalinaw ug kalamboan sa Mindanao  ang gibarugan sa mga negosyador sa gobiyerno.

Sa habig sa MILF, makasabot ‘ta sa ilang pag-insister sa BBL tungod kay kaugmaon sa mga Filipinong Muslim ang gihisgutan dinhi.

Mahinungdanon g’yud nga trataron ang maong isyu sa mas dakong picture ug dili sa “micro-perspective” sama sa nahitabo sa Mamasapano . Ang maong engkwentro posibleng masubli sa makadaghang higayon kun walay tinud-anay nga kalinaw  sa Mindanao. Apan kinahanglan kining mga ‘micro-incidents’ dili ilubong sa limot  ilabi na ang nahitabo sa Mamasapano.

Dunay  daghang mga balaod nga mahimong gamiton batok sa mga nakasala ug kinahanglan lang nga suportahan ang Department of Justice sa ilang trabaho. Prisuhon ang angayang prisuhon aron makab-ot ang hustisya dili lang sa “Fallen 44” kondili lakip sa mga nakalas sa habig sa MILF ug sa mga sibilyan. Anaa na sa mga kamot sa Kongreso ang kaugmaon sa Mindanao ug sa Pilipinas, pila pa kaha ka Mamasapano incident una makatilaw og kalinaw ang Mindanao?