EDITORYAL – Slogan tumanon

Hapit na mapupos ang ikaduha’ng termino ni Mayor Michael Rama ug hangtud karon wala pa niya mahatagi og sulbad ang kanunay’ng paglunop sa downtown area ug ubang mga dapit panahon nga mobunok na ang uwan.

Paglingkod ni Mayor Rama sa katungdanan kaniadto’ng Hulyo 2010, gipahibalo dayon niya iyang ipaguba ang mga ilegal nga straktura nga gitukod daplin sa kasapaan, ilabi na kadto’ng dia mahimutang sa gitawag og Estero Parian.

Gipahibalo sa mayor nga kadto’ng dili moguba sa mga straktura nga nahimutang sulod sa tres metros gikan sa sapa, ang kagamhanan sa dakbayan maoy moguba ug pasakaan og kaso sa hukmanan ang mga hingtungdan.

Apan napupos na lang ang una nga termino sa mayor, ug karon hapit na usab mapupos ang lain nga termino, wala gayud matuman ang iyang plano.

Kun hawanan kanunay ang sapa sama niini’ng sapa nga milagbas sa lainlaing mga balay-patigayon sa dalan Colon lahos na ngadto sa Pier 3, sigurado nga masulbad na ang paglunop dinhi sa downtown area.

Sa gihapon, ang katawhan mangindahay sa “political will” sa kagamhanan ni Mayor Rama aron sa pagpatuman sa iyang kanunay nga gipasiatab nga “tul-iron ang hiwi, limpyohan ang hugaw ug hapsayon ang gubot.”

Klaro nga “hiwi” ug sayop ang pagtukod og kabalayan o building daplin sa mga sapa nga nakapagamay sa agianan sa tubig, ug dili malalis nga hugaw kaayo ang atong kasapaan nga wala na malimpyohi kay lisud ang paghimo niini nga adunay kabalayan sa masi’g ka kilid.

Nindot ang “slogan” sa mayor apan dili masulbad ang problema tungod lang sa mao nga slogan kun dili kini himuon ug ipatuman.