EDITORYAL – Karsada hapsayon

Dili g’yud sayon ang katungdanan sa pagpahapsay sa dagan sa trapiko dinhi sa dakbayan sa Sugbo ug bisan na diha sa mga silingan nato nga dakbayan.

Daghan kaayo ang mga sakyanan nga ang mga drayber badlungon kay dili mutahod sa balaud, apan kuwang ang mga traffic enforcers nga mopahapsay sa trapiko ug manakop sa mga badlungon nga drayber.

Husto ang gihimo sa usa ka tawo nga gitudlo na unta ni Mayor Michael Rama nga mangulo sa City Traffic Operations Management (CITOM) kay dako kaayo ang problema nga iyang atubangon.

Daghang mga eskena nga makita nimo nga karong adlawa adunay traffic enforcers, ugma wala na ‘sab. Makita nimo nga ang mga drayber motuman lang sa balaud kun may makita nga enforcers.

Usahay gani bisan duna pa’y traffic enforcers dili pa motuman ang mga drayber sa balaud kay nasayod man sila nga ang mga traffic enforcers dili na deputized sa LTO ug dili makasakmit sa ilang lisensya.

Ang problema sa kadaghan sa mga sakyanan maoy angay’ng pangitaan og sulbad apan ang mga sakop sa CITOM Board bangkarota pa og sulbad niini’ng mao nga problema.

Si Mayor Michael Rama mikuha ni Ruben Almendras nga iyang tsirman sa CITOM kay midayeg ang mayor sa pamaagi niini pagsulbad sa trapiko atol nga si Rama mitambong og kalihukan nga diha si Almendras.

Kapin na sa tuig nga si Almendras nahimo’ng tsirman sa CITOM apan ang problema sa trapiko wala masulbad. Ang angay’ng himuon mao ang pagpakunhod sa gidaghanon sa mga sakyanan nga managan.

Kadto’ng mga dunot na nga sakyanan, ilabi na mga PUJ’s, apan padayong gipadagan-dagan angay na kini nga did-an. Sa ingon nga paagi mamenus-menosan ang mga sakyanan sa karsada.