Lig-ong panghunahuna

Bisan unsa ka gamay o kagaan sa pagsulay nga mosungog kanato, abuton gyud kita’g kaluya tungod kay wa kitay katakus sa pagbuntog niini. Gumikan nga wala kaayo kita mabansay sa pagbaton og kalig-on sa maayong panghunahuna. Busa sugdan nato kining mga giya sa lig-ong panghunahuna;

* Di motalaw sa kapildihan. Irisgo nga maisogon nga magkinaunsa man,  padayon sa pakigbisog. Mobarug gayud bisan sa kalisud sa sagubangon ini.

Mas labi pang malaumon sa pagtinguha nga makahimo ka gayud sa paglampus.

* Andam mosagup og kausaban. Dawaton sa kasayon ang mga moabot pang mga hagit nga mohaom sa kausaban aron ikaw makaseguro nga modaug.

* Pabilin nga malipayon sa kalisud. Mainantuson sa pagpailob taliwala sa kapait. Di maugtas nga padayong dili molunga sa paglahutay. Di mag-usik og panahon sa mga butang o kusog nga dili mahimo o makakontrol sa kaugalingon.

* Pabiling maayo nga makiangayon. Dili managana sa pagtug-an sa kamatuoran. Mobarug nga may inisyatibo sa pagpalig-on sa ligdong baruganan.

* Andam mosugal sa mga risgo. Bisan pa ni ikasagmuyo sa kaugalingon. Nga perming nakatutok sa unahan alang sa takdang oras sa iyang kalampusan.

* Dili masina o masuya. Moduyog sa pagsaulog sa kalampusan sa uban. Dili makigkompetensiya, nga moabag sa mga kalamboan.