EDITORYAL – Ang pagpakabana

Grabe kaayo karon ang problema sa trapiko sa hapit tanang mga karsada dinhi sa dakbayan sa Sugbo, ug bisan na diha sa dakbayan sa Mandaue.

Kun maminaw ka sa mga programa sa radyo daghan kaayo ang mopadangat sa ilang mga reklamo ug mohimo’g mga sugyot nga kun imong paminawon mura’g suheto kaayo sila sa traffic management.

Kabahin sa problema sa pagkuyanap sa gidili nga matang sa drugas puwerte’ng daghana nga magbagulbol apan mahadlok bisan sa pagtug-an sa ngalan sa mga drug pusher kay basin kuno og sila panimaslan.

Usahay mohimo’g pasangil nga ang mga polis sa ilang dapit nagdawatan og suborno apan kun imong pangutan-on sa ngalan sa polis dili mohatag kay mahadlok.

Hangtud kanus-a man makabaton og kaisog ang katawhan aron moabag sila sa kampanya pagtul-id sa mga hiwi nga binuhatan? Nakalimot sila nga ang katawhan isip kabahin sa “community” kabahin sila sa Five Pillars of Criminal Justice System.

Ang pagbaton og kahadlok sa mga tawo nga maghimo og dautan maoy makapadasig pa sa mga hingtungdan nga mopadayon sa ilang kalihukan.

Angay nga maghugpong ang tanan og batukan ang mga dautang binuhatan sa walay kukahadlok aron ang mga dautang elemento maoy mobati og kalisang.

Niini’ng nagkagrabe na nga sitwasyon sa kahusay ug kalinaw sa atong mga dapit karong panahona angay na ang pagpakabana sa katawhan.