War specialists

Gumikan niini’ng hitabo sa Mindanao, all of a sudden nahimo kita’ng mga war specialists, mga war experts. Kita ra’y kamao ug sila si Noynoy ug ang tibuok gobiyerno, wala’y hibangkaagan, mga banga’ sila’ng tanan.

Mao kini ang atong madunggan sa mga kumentaryo sa radio ug telebisyon ug mabasa sa mga napatik sa mantalaan.

Miingon si kanhi Presidente Fidel Ramos nga dili ta mag-finger pointing. Wala ta’y mahimo niini, makadugang lang ni sa kahigwaos, kabalaka, kasubo, ug kasuko sa katawhan, labi na sa mga hingtungdang banay sa nangamatay nga kapolisan.

Kasagaran ni’ng maong mga war specialists, misugyot og all-out-war batok sa mga bangis nga rebelde. Kinsa may atong gubaton? Kinsa man ni sila? Ug hain na man kini sila karon, naghuwat nga baslan sila?

Dili lalim ang gubat. Ug kun mao kini ang atong buhaton karon dayon, o ugma dayon, mas daghan ang mangamatay, lakip na mga sibilyan nga wala’y labut sa kagubot.

Giingon nga wala’y mudaog sa gubat. Pilde ang tanan. Wala’y victor. Mao nga dli ta magpadala sa emotion. Kita’ng tanan nasubo sa nahitabo sa Mindanao. Apan, atong gamiton ang reason over emotion ni’ng maong sitwasyon.

Akong usbon, sumala sa gisugyot ni Presidente Ramos, nga usa ka military man, dili ta mag-pasanginlanay. Huwaton nato ang resulta sa nagkalainlaing imbestigasyon nga gihimo. Then, let’s move on. Apan, kinahanglan i-identify g’yud kinsa’y responsable sa maong dugoong hitabo, ug ngano’ng nabulilyaso. Apan sekreto man kaha to nga operation? Ngano’ng nahibawo man ang mga rebelde?

* * *

Tan-aw nako, mura’g wa nay kasulbaran ang problema sa trapiko sa atong dakbayan sama sa Manila. Nagsalimuang na sila didto. Naapsan sa kusog nga kaugmaran ang katakos sa kagamhanan pag-contain sa maong problema.

Husto to’ng sugyot ni kanhi Gobernador Lito Osmeña diha nga gihimo siya’ng Chairman sa Flagship Projects sa Ramos administration nga ibalhin ang Malacañang ngadto sa Subic to decongest traffic, among other reasons.

Ug mao usab kini ang traffic situation sa atong dakbayan karon. Misulbong ang population, nagkadaghan ang mga sakyanan sa kadalanan, apan mao lang gihapon ang atong kadalanan, sa mga tartanilya pa ang atong mode of transportation.

Misugyot usab si Lito pagpabalhin sa atong provincial capitol. Mura’g kataw-anan, apan, kun buhaton, gawas nga makapahapsay sa trapiko, masulbad usab ang decongestion ug, among others, maka-disperse sa ekonomikanhong kaugmaran sa dakbayan ug lalawigan.

Apan, mura’g wa pa matawo ang gobernador nga makahimo niini, sama sa gihimo ni Lito sa Ayala Business Park.