EDITORYAL - Hain na ang panumpa?

Ang gihimo sa ubang mga opisyal nga gipasagdan ra ang tinonto sa ilang mga lumolupyo nga nakapagamay sa mga karsada sa barangay maisip nga baliwala lang kanila kun may aksidente nga mahitabo mugna sa ilang pagpasagad.

Tungod kay daghan man nga mga lumolupyo nga nagpuyo daplin sa karsada ug mipaabot sa kabahin sa ilang koral sa ngilit na g’yud sa karsada, ang mga tawo anha na moagi paglakaw sa karsada.

Mopatunga gayud sa karsada ang mga sakyanan aron dili nila madumbolan ang mga tawo nga anaa na sa daplin sa karsada maglakaw mao nga posible’ng mahitabo g’yud ang panagbangga.

Ang mga opisyal sa kabarangayan, apil nga mihimo’g panumpa human sila gideklarar nga mananaog sa eleksyon sa barangay. Nanumpa sila nga sa walay pagpinig, ipatuman gayud nila ang balaod.

Apan hain na man ang ilang gipanumpa? Sa usa ka binisaya nga kanta ang pipila ka linya nagkanayon nga ang panumpa gihimo aron lang pakyason.

Dako’ng hagit karon ni Tisa Barangay Captain Philipp Zafra kay isip presidente sa Association of Barangay Councils (ABC) sa dakbayan sa Sugbo angay’ng makumbinsir g’yud niya ang 80 ka kapitan sa barangay sa dakbayan nga sugdan na sa paglihok kini’ng mao’ng bulohaton.