Kinsa’y sad-an?

Kun napatay man g’yud sa mga sakop sa PNP Special Action Force si Zulfikli Bin Hir alyas Marwan nga “most wanted” nga terorista sa Southeast Asia atol sa operasyon nila sa Maguindanao kaniadto’ng Domingo nga mikalas usab sa ilang kinabuhi, sa walay pagduha-duha sila mga bayani.

Tiaw mo, si Marwan maoy “counterpart” ni Osama Bin Ladin dinhi sa Southeast Asia. Masabot kaayo nga gipangga si Marwan sa mga opisyal ug sakop sa Moro Islamic Liberation Front (MILF) kay makatabang man kini kanila sa pagpanghimo og mga bomba.

Ang isyu karon nga gisumsoman sa katawhan mao kun ngano nga wala pahibaw-a sa maong dako kaayo’ng police operations si PNP Acting Chief Leonardo Espina ug mismo si DILG Secretary Mar Roxas.

Bisan gani si Presidente Aquino mora’g wala masayud nga dunay pagahimuon nga pagpangronda ang mga sakop sa SAF didto sa usa ka lungsod sa Maguindanao aron dakpon si Marwan.

Maisip nga ang kadagkoan sa SAF nagbuot-buot ra sa paghimo sa mao nga operation? O kaha gipanalipdan lang niya ang mga dagko’ng opisyal nga nasayod niini nga mao sila si Presidente Aquino.

Apan ang labing makapatingkag sa dunggan mao ang mga tabi-tabi nga ang suspendido nga PNP Chief nga si Alan Purisima maoy nagmando ug mihatag og “go signal” sa SAF.

Kini tingali ang rason ngano nga si Director Getulio Napeñas miangkon na lang nga siya ra maoy sad-an sa nahitabo nga pagkapatay sa 44 ka sakop sa PNP-SAF.

Kun tinuod ang mga tabi-tabi nga si Napeñas misunod sa kamandoan ni Purisima, wala gayud siya’y rason kay suspendido si Purisima ug dili siya angay nga mosunod sa kamandoan.

Makaluluoy sila si Acting PNP Chief Espina ug DILG Secretary Roxas kay wala diay kasayuran niini ug nasayod na lang sila sa hitabo diha nga patay na ang mga tropa sa kagamhanan.

Gisundog tingali nila ni Napeñas ang gihimo sa Central Intelligence Agency (CIA) nga mironda sa gitagoan ni Bin Ladin ug wala usab mananghid sa mga opisyal sa Pakistan bisan og ang gitagoan duol kini sa ilang kampo.

Ang isyu kay malampuson man ang ilang operation ug walay nangamatay sa mga CIA. Unya, si US President Barrack Obama nasayod sa mao nga operation. Sa ato, si Presidente Aquino wala pahibaw-a.

Buyno, karon kay humana man ang gubat ug daghan na ang mga polis nga namatay, angay’ng dakpon kadto’ng mga MILF nga miatake kanila.