May pagkapukan ba ang tanang gamhanan?

Mga duha na ka tuig human namantala ang sinulat ko dinhi sa Banat News  Tingog sa Katawhan nga nag-ulohan “Ang Sakit nga Gihingalan ug Favoritism.” Karon, pangutana na ‘sab ang akong ipasupot, kun may kinutoban ba ang gahum sa tawo? Gahum, yano nga panultihon ug nindot paminawon apan nagtangag kini og dako nga responsibilidad, ilabi na gayud sa tawo nga naghupot ug gitugyanan niini sa Labaw’ng Makagagahom.

Mga 10 na ko ka tuig sa pagpanerbisyo sa kabatan-onang Sugbuanon, apan karon pa ako makasugat nga lantaran ug makatiurok kaayo nga pagamit sa gahom.

Nabatyagan usab nako nga ilang gihimo ang ilang lamesa sa opisina, nga babag ning yano’ng nangindahay kay may mga manok man sila’ng gikurok na’ng daan nga sarang ikahulip sa pangatungdanan.

Mam, Sir timan-i baya nga ang tanang dahon malaya. Hinuktoki daan, nga may panahon sa pagkatigulang ug moretiro mo’ng tanan ug bati nga palandungon nga wala ta’y ikabilin nga maayo’ng pagtulun-an sa katawhan.

Mao na nga gikan sa kinauyokang bahin sa akong kasing-kasing, ako nagatuktok nga magtinarong mo pirmi kay daghan baya nga hulmigas nga inyo’ng giyatakan nga nipailub lang.

Nigamit lang niini’ng iyang panulat sa pagbuklat sa panultihon “Walay dako nga makapuling kun dili, ang gagmay gayud nga anaa sa ubos.”

Hahay’ akong pangindahay.