Gobiyerno gitraydor

Kapin sa 40 ka sakop sa PNP Special Action Force ang namatay sa giingong engkuwentro nga nahitabo tali sa mga sakop sa Moro Islamic Liberation Front (MILF) ug Bangsamoro Independent Freedom Fighters (BIFF) didto sa Mamasapano, Maguindanao.

Ang gubat giingon nga resulta sa wala pagpahibawo sa mga sakop sa PNP-SAF ngadto sa MILF nga mosulod sila sa ilang teritoryo aron ilang dakpon ang international nga terorista nga si Marwan. Giingon man nga gitagoan sa MILF ug BIFF si Marwan, imo diay silang pahibaw-on?

Ang gobiyerno gitraydor sa MILF nga nakig-alyado sa ila ra usab nga kadugo nga mga sakop sa Bangsamoro Independent Freedom Fighter maong akong gisugyot sa atong gobiyerno ang pagbaliwala sa nasabotan na’ng kalinaw nga wala tumana sa MILF.

Ang gidaghanon sa mga namatay nga sakop sa SAF, klaro nga resulta sa pagtraydor ug dili sa engkuwentro. Ang SAF gibansay alang sa pagpakiggubat sa mga dili basta-basta nga mga kriminal, busa dili ako makatoo nga moabot niini ang gidaghanon sa mga mamatay.

Ako nagduda nga gibanhigan ni sila sa nagkomboya’ng puwersa sa MILF ug BIFF. Pero aron dili maapektohan ang relasyon sa gobiyerno sa Pilipinas ug MILF, ang engkuwentro gipaangkon lang kini nila sa BIFF.

Kun ako ang opisyal sa gobiyerno sundon nako ang gihimo ni Pangulong Erap kaniadto nga milusad og all-out-war batok sa mga sakop sa MILF.