Binugo nga “blackmail”

CEBU, Philippines – Bisan ang batang gamay makasabot nga ang mga bahad ni Mayor Mike Rama nga pasirad-an niya ang South Road Properties sa trapiko kun ang siyudad sa Sugbo dili palabayon og basura sa sanitary landfill sa barangay Tapul, siyudad sa Talisay usa ka dakong “blackmail.”

Tiaw mo na, ang iyang gusto nga adto ipatipun-og sa Talisay ang mga basura sa siyudad. Unya ug kun dili mosugot ang mga opisyal sa Talisay, ipasira ni Mike sa trapiko ang Cebu Coastal Road sa SRP. Pagkadakong likoy niining isyuha!

Si Mike usa ka abogado. Kun practicing man o nalingaw na lang sa iyang pagka-politiko mao nga naglibog na siya sa Local Government Code, dili na importante. Kini tungod kay bisan ang yanong siyudadnon nasayod nga si Mike mayor lamang sa siyudad sa Sugbo ug dili makapasira sa trapiko sa usa ka national road sama sa South Coastal Road sa SRP.

Nasayod siya nga kutob ra gyud siya sa temporaryong pagpasira sa mga national road aron ipahaom sa mga kalihukan. Apan kun makangalngal siya, mura og labaw pa ni Marcos nga gusto gyud nyang matuman ang iyang gustong mahitabo.

Kun ipamugos usab niya ang 40 kilometer per hour nga dagan diha sa SRP, puwerte ra gyud nang hinaya ug nagtuo ko nga mas makamugna pa hinuon kini og kahuot sa trapiko. Aw, kun ang nagtambag niini mao ang iyang mga consultant sa communications, nagtuo ko nga “preconditioning” kini tungod kay mapanglantawan nato nga maghuot gyud ang trapiko sa SRP kun buksan na ang labing dakong SM dinha.

Kun napanglantawan ang kahuot sa trapiko sa SRP, pangitaan kini og sulbad, apan ang 30kph dili kana sulbad.

* * *

Usa ka seryoso nga balita ang gipahibalo sa Malacañang nga adunay pagsulay sa pagpatay kang Pope Francis niadtong pagduaw niya dinhi sa Pilipinas.

Katuohan kaayo ang report tungod kay si Pope Francis dayag nga nagsaway sa Islamic State group sa Iraq ug Syria ug misuporta sa airstrike sa mga lugar nga gilubloban sa mga IS fighters.

Apan tungod sa kahugot sa seguridad sa nasud atol sa pagduaw sa Santo Papa wala mosaler ang plano sa mga dautang grupo. Atong i-congratulate si Interior Secretary Mar Roxas sa iyang pagpamuno sa security preparations sa papal visit nga nagmalampuson.

Ang buhatan ni Roxas ang nagpahimutang sa mga sakop sa Philippine National Police sa mga lugar nga adtoan ug again ni Pope Francis.

Sa papal visit, si Roxas adunay dakong role ug usa niini mao ang pagseguro sa seguridad sa Santo Papa.  Ang ubang mga politiko igo ra gyud nagpaguwapo.