EDITORYAL - Crisis sa SRP

Mibahad na si Mayor Mike Rama nga iyang pasirad-an ang Cebu City side sa Cebu South Coastal Road kung diin nahimutang ang South Road Properties o SRP nga gipanag-iya sa siyudad tungod sa sunod-sunod nga aksidente nga nahitabo didto.

Sakto kaayo ang mayor sa dihang miingon siya nga usa ka crisis ang problema sa SRP. Daghan na kaayong aksidente ang nahitabo sa maong lugar tungod kay kadaghanan sa mga motorista nga mo-agi sa maong dapit wala mosunod sa mga traffic rules, gawas pa sa kangitngit sa lugar kay duna'y parte nga wala'y suga.

Usa sa wala gayud gituman sa balaod sa trapiko sa SRP mao ang speed limit nga 60 kph. Aduna'y daghang motorista nga kusog kaayo magpadagan sa ilang mga sakyanan, aduna pu'y pwerte hinaya. Gani, dili man gani mosunod sa kung unsa nga lane ilang gamiton kung kusog ilang padagan o hinay ba.

Inig ka gabii, daghan usab kaayong mga motorista nga mogamit sa SRP nga wala'y suga ang mga sakyanan! Pun-an pa sa mga motorsiklo nga patuyang lang og overtake bisan wala sila sa lugar.

Nganong nakalusot man ang ingon ani kadaghan nga mga kalapasan sa trapiko sa SRP? Kun duna'y mga traffic enforcer nga magbantay sa maong dalan kanunay, makalusot kaha ang mga kalapasan?

Nagplano si Mayor Rama nga himuong 40kph ang speed limit sa SRP ug sa pagbutang og dugang warning signs. Nindot kining mga planoha apan, kinahanglan sad nga duna'y kahimanan sa pag-check sa speed sa mga sakyanan nga moagi didto ug butangan sad og dugang traffic police didto kay wala ra gihapo'y gamit ang traffic rules kung wala'y magpatuman niini.