Maayo’ng pag-abot Papa

Niini’ng semanaha, adunay duha ka hitabo. Ang una, makapahimuot ug makalipay tungod sa pag-abot ni Pope Francis. Ang ikaduha makapabalaka tungod sa pag-abot sa una’ng bagyo ning tuiga nga gitawag og Amang.

Ang duha sigun sa Pag-asa magdungan pag-abot dinhi sa nasud, ilabi na sa Tacloban. (Bisan pa sa bati nga panahon, modayon g’yud si Pope Francis pag-anhi sa Pilipinas, ilabi na sa Tacloban ug Palo, Leyte)

Hangpon ug sugaton nato si Pope Francis sa tumang kalipay sa iyang pag-abot dinhi sa nasud ug i-ampo ta ang pagkahilis ug dili pagdayon sa bagyo’ng si Amang.

Sa iyang pag-abot, atong gilauman nga dala ni Pope Francis ang paglaum sa kalinaw, panaghiusa ug kaharohay sa pagpuyo.

Sa iyang pag-abot dili usab nato ikalimod nga luyo sa atong kalipay anaa nagpahipi ang mga kabalaka sa seguridad sa Santo Papa.

Mao kini ang hinungdan kun ngano nga nanawagan si Presidente Noynoy Aquino ngadto sa katawhan sa pagkooperar, ug paghiusa sa paghatag og seguridad sa Santo Papa.

Ang seguridad sa pagpuyo og lima ka adlaw sa Santo Papa dinhi sa nasud dili lang nato kini isangon ngadto sa atong kapolisan ug militar ingon man sa mga volunters.

Kinahanglan kita nga motabang kay dako kaayo kita og tulobagon sa bisan unsa man nga mahitabo ni Pope Francis dinhi sa nasud.