Paghandom sa higala
Mipahulay na sa dayon si Tony “Erap” Avila, usa sa mga suod nato’ng higala sa pagpanibya.
Akong nakauban si Tony sa sayo’ng bahin sa tuig 1980 sa didto pa kita magsibya sa DYFX isip regular nga kawani sa maong estasyon.
Sila si Tony, Vic Canoy ug Inday Nita Daluz (nga pulos mitaliwan na) nagbayad og oras sa ilang pagsibya sa mao’ng estasyon.
Didto nato masinati ang pagkamaayong tawo ni Tony, mahigalaon, maloloy-on sa mga tawo’ng nanginahanglan, kinsa moduol kaniya human sa iyang tulumanon.
Apan gawas sa iyang kalantip sa panibya, may hiyas usab siya sa pagpamadlong sa mga tawo’ng bugoy sa una nga panahon.
Usa sa dili nako hikalimtan, kadto’ng higayon nga gipasakay kami ni Tony sa iyang awto si Ely Baquero gikan sa DYFX ug pag-abot namo sa duol sa eskina Sanciangko ug Pelaez, may mga misuway og paregla pinaagi sa pagbabag-babag sa karsada.
Mikanaog sa Tony sa awto ug gipamadlong ang mga namaregla hangtud nga nanagan kini pahilayo kanamo.
Nabalhin ko sa DYMR ug si Tony usab sa laing estasyon sa radio. Bisan pulos ra ania sa Cebu apan panagsa na lang kami nagkita ug hangtud nga nasayran nga mipahulay na siya sa dayon.
Pastilan baya kini’ng atong kinabuhi. Kun kapugngan pa lang, maayo unta’ng dili na lang kita mamatay, apan malantaw usab nato nga basin kun matiguwang na ta pag-ayo ug makapabug-at na hinuon kita sa atong mga anak ug mga apo.
Busa mas maayo usab nga mentras tanto nga may ikabilin pa kita nga maayo’ng legasiya, ato kini’ng himuon sa dili pa kita motaliwan sa dayon.
* * *
- Latest
