Sinulog na pud!

Alang kanato’ng mga senior citizens, daghan na’ng Sinulog ang atong nasaksihan. I’d like to insist nga ang first Sinulog was held in 1980, dili 1981.

Gihatagan ko’g kopya sa 1980 Sinulog souvenir program ni Sinulog Director David “Boy” Odilao, ang amahan sa Sinulog sa Sugbo, panahon pa nila Mayor Florentino Solon ug Gov. Eddie Gullas. Anyway, ang orihinal nga Sinulog was mainly an offering ngadto sa Balaang Bata. Wa pa ma-commercialize. It was the cultural aspect of the celebration. Hangtud nga nahimo na’ng industriya sa turismo.

Daghan na’g interpretation ang pagsayaw sa Sinulog sa diha nga nahimo na kini’ng indigay sa mga mosalmot sa celebration. Ang mga T-shirt naghulagway na sa Ati-Atihan ug Dinagyang sa Negros, ug ubang arte sa maskara. Ipakapin na lang ang hulagway sa Sto Niño.

Unya, aron nindot paminawon, ila kining ginganlan og Sinulog Mardi Gras. Maayo man gani kay nakaamgo tingali sila sa kahulogan sa Mardi Gras, karon ilang gibalik sa pagka-Sinulog Grand Parade.

Ania ang kahulogan sa mardi gras: 1) last day before Lent celebrated in New Orleans, etc, with festivities; 2) the last day of a carnival celebrated in Paris, New Orleans and cities with parades and special festivities; 3) Shrove Tuesday. Duna say Shrove tide. Unsa man ning Shrove? Shrove Tuesday - the day before Ash Wednesday; Shrove tide - the period of three days preceding Ash Wednesday.

Ngano man tuod nga ang Sinulog nahimo man nga mardi gras? Sa Pebrero 18 pa ang Ash Wednesday; nga kun gusto ta’ng mag-mardi gras, unya pa sa Pebrero 17, a day before Ash Wednesday.

Ug ato diay’ng ipahinumdom dinhi nga ang Sinulog dili maoy main celebration sa Fiesta Señor. Pakapin lang ni isip cultural aspect sa celebration. Nga kun ang imong tuyo mao lang ang pagtan-aw sa street dancing, walay labut ang mga novena-masses, ang sacrificial walk, ang religious procession ug pontifical mass, ug ubang religious activities, ug di gani ka molili sa Basilica, igo lang ka’ng naglingawlingaw sa imong kaugalingon, wala ka mamiyesta. Igo lang ka nga nagpalambo sa industriya sa turismo sa siyudad.

Isip senior citizen, ambot pila na ka tuig nga sa TV na lang ko motan-aw sa Sinulog. Tagbaw na ko. Alang nako, ang mga costumes ray mag-usab-usab ug ang mga props. The rest mao lang g’yud gihapon.

Anyway, Pit Senyor!