Nasakit ang katabang

Dear Atty. Divine,

Ang akong anak nagtrabaho isip usa ka katabang ug tulo ka tuig na siya nga nagtrabaho sa iyang amo. Karong bag-o, nasakit siya ug na-admit sa ospital. Ang amo maoy mibayad sa iyang hospital bills. Obligado ba ang akong anak sa pagbayad sa iyang amo sa ilang nagasto sa hospital? -Lucia

Dear Lucia,

Base sa bag-ong balaud nga Domestic Workers Act o Kasambahay Law, kini nagkanayon nga ang employer o amo sa usa ka domestic helper kinahanglan nga mo-provide og assistance sa iyang katabang kun kini masakit atol sa iyang pagtrabaho without losing her benefits (sec.6).

Buot ipasabot nga ang employer sa imong anak obligado sa pag-abaga sa gastohan sa tambal ug ospital sa imong anak ug dili na kinahanglan nga mobayad pa ang imong anak sa mga nagasto niini.

Anyway, pila ra man na’ng maong expenses alang sa employer nga maoy maka-afford sa pagbayad. Kahibawo ta nga gamay ra intawon ang suweldo sa mga katabang ug kun masakit sila unya kuhaan pa ang ilang madawat alang sa tambal hayan wa na silay mahabilin alang sa ilang pamilya.

Kun pananglitan mamugos g’yud ang employer nga pabayron ang imong anak sa nagasto hangyoa lang ‘sab aron makasabot sila sa inyong sitwasyon. – Atty. Divine

* * *

Alang sa inyong pangutana ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules ug Domingo.