EDITORYAL - Seguridad luyo niining hulga sa terorismo

Kinahanglang pahugtan pa og maayo sa Pilipinas ang seguridad niini karong mosunod nga mga adlaw samtang nagkaduol ang petsa sa pagduaw ni Pope Francis karong Enero 15 hangtud sa Enero 19.

Kini human sa nahitabong terror attacks sa nasud sa France nga miresulta sa pagkamatay sa mga tawo ingon man sa mga suspek.

Dunay dili momenus 50 mil ka mga polis ug sundalo ang giandam alang sa seguridad sa Metro Manila nga diin kadaghanan sa kalihokan sa Santo Papa himuon ug ingon man sa Leyte.

Si Presidente Benigno Aquino III nanawagan sa mga Filipino nga magtinabangay sa pagbantay sa Santo Papa, angayan lang g’yud kining himuon tungod sa kadakong gubot nga ibunga niini kun simbako dunay dautang mahitabo.

Ang nahitabo sa France makapakurat kaayo tungod kay mga French nationals kansang mga ginikanan mga Arabo ang nangatake. Ang gibuhat sa managsuong terorista nagpakita lang sa ilang dakong kasuko sa ilang gobiyerno ug sa sistema sa ilang nasud.

Apan ingon niini g’yud ang terorismo, giisip na nilang  usa ka katungod ang manakit o mopatay og isi’g –kaingon tungod kay wala sila makauyon kanila o sa ilang gipangbuhat.

Bisan si kinsa ug unsa pa mang relihiyon, Kristiyano man o Muslim, walay pili ang mga terorismo basta matagbaw lang sila sa kauhaw nila sa kagubot ug makamugna og kalisang sa mga tawo.

Busa, kinahanglang mag-ampo ang tanan ug motabang sa seguridad alang sa luwas nga pagbisita ug pagbiya dinhi sa Pilipinas sa Santo Papa ingon man ang kalamposan ug malinawong pagsaulog sa Cebu sa tinuig nga Sinulog.