Ayaw g’yud kompiyansa

Plano ba ninyo nga manglakaw atol sa mga kalihukan sa Sinulog, ilabi na atol sa grand parade? Hisgotan nato ang mga fire safety tips aron masiguro nga hingpit kamo’ng luwas sa sunog.

Sa dili pa kamo mobiya sa inyo’ng panimalay, ibton g’yud ang tanang koneksyon sa mga electrical appliances nga wala gigamit. Kun mahimo i-off na lang ang plangka.

Angayan pud nato nga isiguro ang pag-off sa atong LPG regulator aron makalikay kita sa disgrasya. Mas maayo og i- check na nato’ng daan og maayo pa ba ang atong LPG hose ug regulator.

Ayaw ninyo ibaliwala ang mga ginagmay nga paghungaw sa inyo’ng LPG kay kini delikado kaayo. Dali ra kaayo ang pag-check kun duna bay hungaw.

Magkuha ka lang og panapton, foam o gamit nato sa paghugas sa plato, sabonan kini ug pabolaon. Dayon ipahid kini gikan sa regulator, sa hose ug hangtud didto sa koneksyon sa atong stove.

Kun makakita kamo ug magbula-bola sa asa nga parte sa imong gipahiran, timailhan kini nga depektoso na ang inyo’ng hose o ba kaha regulator.

Busa angayan dayon kining ilisan og bag-o. Ayaw ninyo ibutang sa peligro ang mga kinabuhi sa tanang miyembro sa panimalay tungod lang sa imong pagkainot o pag-ayum-ayom lang sa depektoso nga LPG.

Inigsuon lang kini nga sugyot! Unta hatagan og igong gibug-aton ang akong mga pahimangno. Ang inyo’ng kabomberohan manghinaut nga sa atong pagsaulog sa fiesta ni Senyor Sto Niño, mahimo unta kini’ng hapsay, mabulokon ug wala unta'y kakulian nga atong masinati.

Nagpabiling alerto ang tanang bombero. Gani ugma ipakatap na sa mga strategic locations ang atong mga firetrucks aron kini andam nga moresponde kun ugaling dunay alarma sa sunog.

Masaligon kita nga pinaagi sa grasya sa Batang Jesus, makasiguro kita nga malinawon ug hapsay ra unya ang tanan nga kalihokan. Viva Pit Senyor!