EDITORYAL - Panaghiusa sa Muslim ug Kristiyano

Panahon karon sa paghiusa sa mga Kristiyano ug mga Muslim tunga-tunga niining bag-ong nahitabong pag-atake sa usa ka weekly satirical newspaper nga Charlie Hebdo sa nasud sa France diin 12 ka mga tawo ang nakalas.

Ang mismong opisina niini ang giatake ug gipamatay ang duha ka nagbantay nga polis ug mga walo ka staff apil na ang ilang editor , usa ka janitor ug usa ka bisita sa udtong tutok.

Dali kaayo nga gikondenar sa mga nagkadaiyang lider sa kalibotan ang maong terror attack apil na ang United Nations nga nanawagan sa mga gobiyerno nga kinahanglang panalipdan nila ang kagawasan sa pagpadayag sa ilang mga nasud.

Nag-ugat ang grabeng kasuko sa managsuong suspek sa maong pamantalaan tungod sa gihulagway nilang pagbugal-bugal sa Islam ug sa propetang si Muhammad sa usa sa ilang mga editorial cartoons.

Ang maong pag-atake nagbutang karon sa dili maayong sitwasyon sa relasyon tali sa mga Muslim ug Kristiyano ngadto sa Uropa.

Makita kini base sa mga gipanglusad nga protest rallies sa nagkadaiyang mga nasud  sa Uropa ug dili kalikayan nga mobati og kahadlok ang mga “neutral” nga mga Kristiyano ug Muslim sa komunidad.

Ang reaksyon sa kalibotan sa nahitabo nagpakita lang kung unsa ka mahinungdanon nga dunay kagawasan sa pagpadayag bisan og unsa pa nga relihiyon o tinuohan.

Ang presensya sa prensa o media sa usa ka nasud usa ka timailhan nga dunay tinud-anay nga kagawasan ang katawhang nagpuyo niini.

Ang France usa sa mga nasud nga mipadala og fighter jets batok sa Islamic State sa Middle East ug daan nang gihulga nga panimaslan diha sa mismong tugkaran niini.