Duha ka dagway sa Simbahan
Ang Simbahang Katoliko nga maabtan ni Pope Francis sa iyang pagduaw sa Pilipinas ug Kabisay-an sunod semana nabahin sa duha ka dagkong hut-ong:
Una, ug hinaot nga sila na ang mas daghan, madasigong nagpaluyo sa pasiunang kausaban nga iyang gipasiugdahan paghimong mas yano ug pagpaduol sa simbahan ngadto sa kinabag-an sa katawhan; ug
Ikaduha, ug hinaot nga pipila na lang sila nga nahibilin, hilom apan hugtanon nga nisupak sa nabantang nga mga lakang sa Santo Papa pagsalikway sa palasyo niyang pinuy-anan, eksklusibo niyang kan-anan, luho niyang mga sakyanan, pagnegosyo sa simbahan ug lapad nga pagpahimus sa labing tag-as nga katungdanan sa Vatican.
* * *
Ikaw maoy labing nakaila sa kaparian nga nagduma sa imong parokya. Ikaw ang labing nakahibawo kun hain sila mahisakop--sa una o sa ikaduhang hut-ong. Mangahas ko pagtabang nimo pag-ila sa tinuod nilang bulok:
Human gidasig ni Pope Francis ang kaparian, di lang pinaagi sa sulti kun dili sa buhat gyud, pagbiya sa harianon nilang mga pinuy-anan ug pagsalikway sa mahalon nilang mga sakyanan, nibiya na ba sila sa luhong mga kumbento ug nipili na ba sa mas yanong mga sakyanan o nikuyog gyod sa kasarangang mga pasahero?
Human gihulagway ni Pope Francis nga imoral ang pagnegosyo sa mga sakramento ug mga pangalagad sa simbahan, nihunong na ba o nagpaugat sa pagpadayon pagpangolekta sa gikaintapan nga mga aransel, o gitakdang bayranan sa mga misa, bunyag, kasal ug lubong?
* * *
Kasagaran sa kausaban nga gipatuman sa Santo Papa gitumong sa pagbanhaw sa kaligdong ug kasuod sa simbahan ngadto sa binilyon ka mga Katoliko, nga gikabalak-an nga namiya na sa simbahan tungod sa kahiwian ug pangabuso sa pipila ka kaparian.
Giisip nga labing lisod ug labing kuyaw mao ang iyang pagdeklarar og gubat batok sa pangurakot sa Vatican. Gipalagpot niya ang mga tagduma sa Vatican Bank kinsa gilambigit sa money laundering ug ubang makauuwaw nga krimen. Apan wa mopakita si Pope Francis og bisan unsang timaan sa panagana ug pagtalaw.
* * *
Laing kausaban nga gibungulbungolan lang sa kaparian nga way bilib sa Santo Papa mao ang pagbakwi sa karaang pagtuo nga matang sa aborsiyon ang artipisyal nga kontraseptibo. Atol sa labing uwahing kalibotanong tigom sa mga obispo, nilampos si Pope Francis pagpasar sa deklarasyon nga naghatag og kagawasan sa mga magtiayon pagpili sa labing tukma nga mga paagi sa pagkontrolar sa ilang pagpanganak.
Ambot may pari na ba sa Sugbo nga naghisgot sa kausaban. Wa pa gyod koy pari nga nadunggan nga nagpahibawo sa mga parokyano nga di na krimen sa simbahan ang paggamit og pills, condom, IUD ug ubang kontraseptibo. May pipila pa gani nga nagpa-goryo-goryo ug padayong nanghudlat nga ma-impiyerno ang mga niduso ug niggamit sa mga kontraseptibo.
- Latest
