Gimmick ra g’yud

Milutaw na g’yud ang tinuod nga pamolitika ra ni Vice President Jejomar Binay ang pagbisita sa mga dapit sa Sugbo kay ang iyang mga alyado nga miuban-uban kaniya nanghatag og mga t-shirts nga minarkahan og “We Love Binay” sa likud.

Unya nakakita si Binay nga diha’y bag-o pa nga namatay nga pasyente sa Vicente Sotto Memorial Medical Center (VSMMC), abtik kaayo ang bise presidente nga nangayo’g subre nga may sulod na’ng daan nga kuwarta ug gitunol sa tagtungod sa namatay.

Ang nindot lagi unta nga gipapaspasan ni Binay ang paghatag og mga tabang sa mga biktima sa bagyo ingon man sa ubang tabangan pinaagi sa Department of Social Welfare and Development (DSWD).

Kun gihimo pa kini ni Binay dili unta magyawyaw ang mayor sa Ronda kay hangtud karon wala pa siya makakita og bisan anino sa taga DSWD nga miadto sa ilang dapit ug mitabang sa mga biktima sa katalagman.

Hagiton nako si Binay nga kun tinuod man g’yud siya nga mutabang, pagahinan niya og P1.5 bilyones gikan sa nasudnong kagamhanan ang pagpatukod sa bag-ong Cebu City Medical Center (CCMC) building.

Ayaw na’ng maghatag lang og ginagmay nga kantidad ug mga putos sa pagkaon sa pipila lang ka tawo. Ingna ko nga bakakon, daghan sa mga biktima sa katalagman nga wala niya mahatagi mangasuko kang Binay.

Wala g’yud ko makagusto sa pagdumili ni Binay sa pagtubag sa mga pasangil kaniya nga naglambigit sa giingong pagpangurakot. Sayonan ka nga matud pa gi-overprice ang pagpatukod sa Makati City parking building ug Makati Science High School building.

Diha nga mianhi si Binay sa dakbayan, apil ko sa media nga mi-cover diha nga milakaw siya gikan sa City Hall paingon sa Barangay Pasil, dayon sa Barangay Suba ug ngadto na sa Taboan Market.

Naghinam-hinam ko nga maka-interview na kang Binay, apan nabawo ko kay gibiyaan lang kami nga mga reporters didto sa Taboan Market human sa gipahigayong boodle fight, pagkaon nga nagkinamot.

Ako pa ni Binay, tubagon niya ang mao nga isyu pinaagi sa pagpahigayon og “formal interview” gikan sa mga sakop sa media. Ayaw na’ng ikaw ang magpili kun asa ka nga sibyaanan nga magpa-interview.

Kanang pangutana nga wala’y pugong-pugong. Kun tinuod nga wala siya makahimo og sayop, ang pagtubag niya sa pangutana sa media mas nindot pa nga publisidad kay sa magpahigayon og boodle fight nga klaro kaayo nga usa lang ka “gimmick.”

Usbon nako, kun tinuod ka mutabang si Binay, patukori ang dakbayan og bag-ong ospital. Alyado mo si Mayor Mike Rama unya dili ka mutabang?