Wala makabayad sa utang

Dear Atty. Divine,

Nakahuwam ko og kuwarta sa akong amiga. Ang maong utang payable for six months apan wala ko kabayad kay naapiki ko sa kuwarta. Karon iya ko’ng gipaningil, plus interest, attorney's fees and damages. Misamot na hinuon kadako ang akong utang kay miabot kini og P85 mil ug matud pa niya kun dili ko kabayad karong buwana iya kuno ko ikiha. Ang akong pangutana atorni kun mahimo ba ko niya nga ikiha? Unsa man nga kaso? Unsa may maayo nako nga buhaton? - Lanie

Dear Lanie,

Tungod sa imong kapakyas sa pagbayad sa imong utang nahimo na kining due hinungdan nga iya ka’ng gipaningil. Kun mapakyas g’yud ka sa pagbayad niini mahimo siya’ng modangop sa korte pinaagi sa pagpasaka og kaso aron iyang makolekta diha kanimo ang maong utang busa civil case ang nature sa maong kaso. Kanang iyang gipangayo nga damages ug attorney's fees kun wa kana malatid sa inyong kasabutan, hayan makakolekta lang siya niana kanimo kun aduna nay mando sa korte sa pag-award og damages ug attorney's fees kaniya. Ang maayo nimo nga buhaton karon mao ang pagpakigsulti kaniya ug hangyoa lang nga imong hinay-hinayan sa pagbayad ang maong utang aron dili na mo mahasol pa sa pag-adto sa korte. - Atty. Divine

Alang sa inyong pangutana ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules ug Domingo.