Diin siya’g pundo para sa Ronda

Ang pagpanghatag og hinabang ngadto sa mga biktima sa trahedya nahimo nang gimik sa mga politiko aron pagbaligya sa ilang kaugalingon.

Ang nakaparat lang, kun pa-estoryahon kining mga politiko ipalutaw ngadto sa mga gipangtabangan nga gikan niya ang kuwarta ug uban pa’ng hinabang nga gipang-apud-apod.

Motuo pud ang mga tawo. Motuo sa ilad sa mga politiko nga sa ilang kaugalingong bulsa ang salapi nga gipanghatag. Nailad lang kay sa tinuod, ang salapi gikan sa buhis sa katawhan. Ug malampuson sila sa pag-angkon nga ilaha, ang kuwestiyon mao ang tinubdan sa maong salapi.

Kagahapon, si Bise Presidente Jejomar Binay mituyo og adto sa lungsod sa Ronda aron sa pagpanghatag og P10,000 sa mga pamilya kang kansang pinuy-anan na-wipeout sa bagyo’ng Seniang, ug P5,000 sa ubang biktima sa kalamidad.

Bisan unsaon og balibali, klaro man nga pangampanya ang iyang gihimo sa Ronda.

Una, dili man siya kalihim sa Department of Social Welfare and Development nga maoy adunay tahas pagseguro nga matratar ang mga biktima sa mga trahedya. Ikaduha, diin man og pundo si Binay alang niana’ng tag-P10,000 ug tag-P5,000 nga gipanghatag sa Ronda? Timan-i nga wala’y calamity fund ang Office of the Vice President nga ipanghatag busa kuwestiyonable ang tinubdan sa pundo. Kun gikan sa bulsa niya, ingon na g’yud diay siya kasapian? Pila ra may suweldo sa bise presidente? Ikatulo, ngano’ng sa Ronda man nga aduna may mga lungsod nga mas nagkinahanglan sa tabang sa kagamhanang nasyonal?

Ang housing maoy tahas ni Binay,apan wala gani niya matarong sa pagsuperbisar. Ang mga kapitalista sa mga real estate industry nanga-adunahan og samot, samtang ang mga namalit og balay nagbagood sa pagbayad sa kamahal bisan sa mga low-cost housing nga impason katunga sa kinabuhi sa tawo. Kay dili man makapasikat sa housing industry, mangita g’yud si Binay og pamaagi aron makapangampanya og sayo.

Apan ngano’ng sa Cebu pa man g’yud? Basin nagtuo si Binay nga mailad niya ang mga Sugboanon nga sa iyang mga pakig-bodol og kaon sa mga lungsod, giganahan ang mga tawo niya.

Akong balikon, lahi ang Sugbo. Mga intelehenti’ng mga botante ang mga Sugboanon.

Hangtud karon, uhaw ang mga Sugboanon sa mga tubag ni Binay kalabot sa pasangil sa iyang pagpaka-dato sa puwesto.

Hangtud karon, nagpaabot ang mga Sugboanon sa iyang pagpasabot nganong ingon kamahal ang parking building sa Makati, ang tunghaan ug ang mga cake; ug nganong ingon de aircon ang baboyan sa Hacienda Binay sa Rosario, Batangas, samtang daghan sa mga Filipino ang nag-antos sa mga barong-barong. Nagtuo ko nga naninguha si Binay dinhi sa Sugbo kay sa 2010 presidential elections, midaog si Mar Roxas dinhi.