David at Goliath
Waring hindi pantay ang tao sa mundo
may taong marunong at saka may bobo;
Taong marurunong ay umaasenso
mga utak biya nagkalat sa kanto!
Ang tao’y hinulma sa dalwang larawan
may nilikhang pangit may maganda naman;
Kaya di totoo nasa kasulatan --
ang lahat nang tao sila’y pantay-pantay!
Sa mga labanang ang gamit ay armas
madalas magwagi armas na malakas;
Ang taong may baril ay panalo agad
daig na daig n’ya gamit lang ay itak!
Sa ating halalan ang isang mapera
tiyak na panalo sa botong nakuha;
Dukhang kandidato talung-talo niya
kung medyo panalo ay pinapatay pa!
Magkakapit-bahay kapag nag-aaway
laging nagwawagi pamilyang mayaman;
Mga maralita’y hindi makalaban
dahil walang pera’y talo sa hukuman!
Mayayamang tao’y takbo sa casino
kasosyo’y manager pag-uwi’y panalo;
taong maralita nagsasabong ito
maysakit ang manok umuuwing talo!
Matangkad na tao’y yumayaman agad
hindi makaabot mga taong pandak;
Pero may panahong ang taong matangkad
ay nadadaig din ng taong masipag!
David at Goliath – isang halimbawa
na sa kasaysaya’y nabasa ng madla;
Maliit si David mahal nang Bathala -
tinalo ang giant na ulo’y mahina!
- Latest
