Unsa ang mabag-o sa Bag-ong Tuig?

Sa paghagtok gayud sa tunga’ng gabii sa pagsugat sa Bag-ong Tuig, maoy sagad nga mapintal sa pamayhon sa katawhan ang tumang kahinangop  hinungdan nga ang kadaghanan maoy ilang pagahimoon ang pagpaboto og rebentador, pag-atubang sa talad kan-anan aron saw-an ang lamian nga mga pagkaon nga ilang giandam o pag-inom og ilimnon’g makahubog.

Tugob sa kamaya ang katawhan sa pagsugat sa Bag-ong Tuig ug atong mabati ang mga pagtimbaya nga “Happy New Year” sa walay paghunahuna sa mga mahitabo sanglit wala may makatagna sa nagpaabot sa unahan sa paglabay sa mga adlaw ug mga bulan sa tuig 2015.

Nagtuo ang ubang katawhan nga ang mabag-o sa tuig 2015 mao lang gayud ang kalendaryo kay hingpit na man nga tangtangon ang gibitay o gipapilit sa bongbong nga kalendaryo nga 2014 aron ilisan og bag-o kay dili na man kini magamit.

Samtang mabag-o na ang kalendaryo sa Bag-ong Tuig 2015, apan ang mga naandan nga kahimtang sa kagamhanan o katawhan sa gihapon magpabilin nga dili gayud mabag-o ug walay kausaban.

Naglakip na niini ang nasinati nga kalisod nga kahimtang sa katawhan nga matud pa nila nga mabag-o man o dili ang tuig, sa gihapon magpabilin ang daan nila’ng kasinatian sa pagpadayon sa ilang pagpakigbisog sa pag-angkon sa gitinguha nila nga tingusbawan.

Adunay nag-ingon nga maayo unta nga niini’ng bag-ong tuig maoy ilang masinati ang pagkunhod sa presyo sa mga nag-unang palaliton nga namatikdan sa miagi’ng tuig 2014 nga dili maayo nga pagkaangay.

Namatikdan man gud nga sa tuig 2014 maoy nasinati ang sagunson nga pagkunhod sa presyo sa gasolina apan wala kini makapalipay sa katawhan kay wala man mokubos ang presyo sa palaliton ug bisan gani sa pletehan.