EDITORYAL - Total ban sa pabuto

Dako kaayo ang kalamposan sa gobiyerno ilabi na sa mga hingtungdang ahensiya niini sa kampanya pagpamenus sa mga mabiktima sa pabuto.

Matud pa sa Department of Health nakatala kini og 593 ka mga kaso sa mga injuries atol sa pagsugat sa Bag-ong Tuig mas ubos kini og 40 porsiyento itandi sa miaging tuig, gani miubos usab ang gidaghanon sa mga nabiktima sa Piccolo.

Apan di pa angay magmaya o mokompiyansa ang DOH ug ang uban pang ahensiya sa gobiyerno nga gitahasan niini nga kampanyang Oplan Iwas Paputok.

Ang DOH nagtuo nga naleksyon na ang katawhan sa paggamit og pabuto ug nakaamgo na sila sa kung unsa kini ka peligro.

Samtang tinuod gihimo sa DOH ug sa kapolisan ang ilang mga trabaho tungod kay may nakita mang kalamboan, apan wala kini magpasabot nga bunga kini sa ilang aktibong kampanya lamang.

Ang katawhan maoy misanong sa panawagan sa kampanya ug dili tungod sa aktibong pagpanakop lang sa mga awtoridad.

Gani pwerte gihapong daghanang namaligya’g pabuto bisan dunay mga lokal nga ordinansa batok niini sa gawas sa gitaganang firecracker zones.

Daghang mga barangay ang wala mohimo sa ilang trabaho hinungdan nga  duna g’yuy napalitan ang mga bata nga nabuthan.

Nganong dili na lang g’yud hingpit idili ang pagpamaligya ug pagpanghimo og pabuto kung di g’yud tuyo nga may mamatay o maangol niini?

Di ba salikwaot nga nagsige og kampanya “Oplan Iwas Paputok” apan mismo ang gobiyerno nagbutang og mga gitawag og firecracker zones?

Ang responsibilidad alang sa luwas nga paggamit sa pabuto naa na sa tawo ilabi na sa mga ginikanan, apan asa na man diay ang kaakohan sa gobiyerno ngadto sa mga batang manguryoso g’yud og gamit niini?