Kiyugpos ni Seniang
Dihang mas daghan ang namakwet kay sa gipaabot samtang nagkaduol ang bagyong Ruby sayo ning buwana, gipahalipayan ang lokal nga mga opisyal ug ang mga molupyo nga naleksiyon na sa pait nga kasinatian sa bagyong Yolanda ug mas andam nang nisagubang sa sunod nga katalagman.
Dihang nihungaw si Ruby, nga super typhoon sa kadagatan apan nahimo na lang kasarangang bagyo pagtugpa sa yuta, ug dihang mas gamay rang kadaot nga namugna kay sa gipaabot, mas gipahalipayan ang tanang hingtungdan kay giisip nga ang mas hinay’ng bagyo ug ang mas gamay’ng kadaot maoy ganti sa mas sayo ug mas lapad nila nga pagpangandam.
* * *
Apan nitumaw sang kabalaka: Ang pagkabawo sa nasobrahan nga pangandam alang ni Ruby, kay nahitabo samtang lab-as pang bangis nga kasinatian ni Yolanda, mahimong mosangpot na sab sa kakuwang og pangandam sa sunod nga bagyo.
Wa mapuypoy ang kabalaka sa paghungaw sa sunudsunod nga low pressure areas (LPAs) nga nisunod ni Ruby. Ang pag-alerto sa mga dapit nga posibleng maigo pulos nabaraw kay nangatunaw ra man ug wa mahimong bagyo. Samtang gipanghinaot nga ang wa mahinayon nga mga hulga makapalambo sa pagpangandam sa katawhan, gikahadlokan sab nga ang sunudsunod nilang pagkabawo mosangpot sa pagpangiyugpos na hinuon inig abot sa tinuod nga katalagman.
* * *
Nga mahimong maoy nahitabo sa pagtumaw sa bagyong Seniang. Nagsugod isip katag nga panganod sa Pasipiko, wa isipa nga seryosong hulga. Samtang nipasidaan nga mahimong maigo ta og ikaduhang bagyo karong buwana, nipadayag og pagsalig ang PAGASA nga gamay ra ang kahigayonan nga mahimong LPA. Dihang naporma nang LPA, gisalikway sab nga gamay rang kahigayonan nga mahimong bagyo.
Dihang nahimong tropical depression, gihulagway nga hinay rang hangin, may nikuwestiyon pa gani nganong gihatagan og ngan bisan wa pa mahimong hingpit nga bagyo. Dihang nikusog ug nahimong tropical storm, uwahi nang tanan. Gilunopan ug gidahilian nang yuta sa tungatungang Mindanao ug apiki nang panagang sa Kabisay-an.
* * *
Ambot tungod ba sa taas nga holidays, o wa lang gyod silay pakabana sa mga katalagman nga di makaapektar sa Metro Manila, mingaw kaayong Malakanyang sa pangandam alang ni Seniang. Way mga sakop sa gabinete nga gipada sa Mindanao ug Kabisay-an ug wa magtagad pagluwat og mensahe pasidaan si Presidente Noynoy Aquino. Wa gani mohimo og bisan unsang press briefing ang PAGASA pagtino nga mahatag ug mapasabot ang labing lab-as nga kasayuran sa bagyo.
Nasobrahang pangandam sa nasudnong gobiyerno ni Ruby kay napaso ni Yolanda. Apan sa kaso ni Seniang, nangiyugpos sila pagbalik. Ug nanakod ang ilang pagkumpiyansa. Mao nga dihang nihasmag si Seniang sa Bohol dayong tungang gabii ug nitabok sa habagatang Sugbo sa kadlawong dako, naapil ang kasagaran sa mga biktima sa pagkabanlas sa baha sa ilang mga pinuy-anan.
- Latest
