Bilangguan nga gitukod

Daghan ang nagtuo nga ang mga bilanggoan nga gipatukod sa kagamhanan maoy nagsilbi’ng hiposanan sa tanang mga tawo nga nakahimo og krimen sa katilingban o kalapasan sa mga balaud.

Ang mga binilanggo gibalhug sulod sa selda dili aron sa paghikaw sa tawhanon nila nga katungod sa pagpakabuhi apan ang tinguha sa kagamhanan mao ang paglikay kanila nga dili na makahimo pa og dugang krimen ug paglikay sa dugang kadaut ngadto sa katilingban.

Samtang nabalhug sulod sa ilang mga selda, gihimo sa kagamhanan ang pag-amuma sa mga binilanggo pinaagi sa pagpakaon ug ang paghimo og mga maayo’ng pamaagi pamasin nga mausab sila ug magbag-o na sa ilang kaugalingon ug kahatagan sila og laing higayon sa pagpakabuhi nga gawasnon.

Apan lahi ang sitwasyon karon sa mga bilanggoan dinhi sa nasud nga ingon sa nahimong dako’ng sukwahi sa katuyoan sa kagamhanan kay sulod sa bilanggoan daw dili man gayud nila maangkon ang hingpit nga pagbag-o sa kaugalingon kay nagsunod man kanila ang kahigayonan sa paghimo og mga ilegal nga kalihukan sama sa pagpamaligya og shabu.

Sa ubang mga bilanggoan gikataho nga nagpadayon gihapon ang  ilegal nga kalihukan sama sa pagpayuhot og ilegal nga drugas nga nakapatumaw sa katahap nga nahimo’ng kakunsabo pa gani ang mga nagdumala sa prisohan.

Kun magpadayon kini nga dili mapakgang sa atong mga opisyal sa kagamhanan ang hiwi nga binuhatan diha sa bilanggoan nahadlok ko nga ang mga binilanggo dili lang gamiton sa ilegal nga kalihukan kondili, hayan pa nga sila pagawason pa gayud aron  pahimuon og krimen, dayon mobalik ra usab pagsulod sa ilang selda sa higayon nga nahingpit na nila  pagtuman ang gimando kanila sa abusado’ng mga opisyal.