Sayaw ni Pope Francis

Bisan di mohapit si Pope Francis, bisan way bisan usa sa mga biktima sa bagyong Yolanda sa amihanang Sugbo nga gitugotang makigsawo niya og paniudto sa Palo, Leyte unya sa Enero 17 ug bisan way apil ang Sugbo sa holidays atol sa lima ka adlaw niyang pagduaw, naningkamot ang mga Sugbuanon nga makapadangat sa ilang mga mensahe paghangop sa pagduaw sa Santo Papa sa Pilipinas ug Kabisay-an sunod buwan.

Gipabaha nila ang mga pangaliya ug mga pasalamat alang ni Pope Francis. Gigamit sa media organizations ang tradisyonal nga mga plataporma ug social media sa pagpabuhagay sa nasudnong kahinam sa pagduaw sa Santo Papa.

* * *

Apil sa nangandam ang mga piniriso sa Cebu Provincial Detention and Rehabilitation Center (CPDRC). Ang mga binilanggo nga nabantog na sa tibuok kalibotan tungod sa talagsaon nilang disiplina solemne nga manayaw pagpasidungog sa mga mithi sa kamapaubsanon ug kamapasayluon nga gipasundayag ni Pope Francis.

Ilang choreographer nga si Vince Rosales nipahibawo sa TV Patrol Central Visayas nga padayon siya nga nagtuon og mga awit nga haom nga iduyog sa ilang sayaw. Matud niya ang sentro sa yano nilang halad mao ang higanteng hulagway ni Pope Francis nga palibotan, sapnayon ug ipatigbabaw sa mga binilanggo nga puno sa paghinulsol ug pasalamat.

* * *

Matud ni Rosales himuon ang ilang sayaw unya o sa di pa ang mga adlaw sa pagduaw ni Pope Francis gikan sa Enero 15 ngadto sa Enero 19. Sama sa nangagi nilang mga sayaw, i-upload nila sa YouTube ang video uban ang panghinaot nga makadapit sa pagtagad sa kadagkoan sa Vatican ug makit-an sa Santo Papa.

Niingon si Rosales nga di na sama kalisod ang pagbansay-bansay sa mga piniriso. Lahi sa ilang pagsugod niadtong 2007 nga napul-an pa siya og pasabot nganong kinahanglan pa silang manayaw, inay maghimo lang og mas yano nga mga paugnat sa kusog. Sama ni Rosales, gihangop sab sa mga binilanggo nga among nahinabi ang kahigayonan pagsayaw alang ni Pope Francis.

* * *

Sama sa mga piniriso sa CPDRC ug sa nagpakabana nga mga Sugbuanon, inay mangluod nga gilaktawan ang Sugbo ug nahikawan ang mga Sugbuanon, angay tang magpasalamat nga nakahigayon si Pope Francis pagduaw sa Pilipinas ug Kabisay-an. Di niya mahimong maduaw ang tanang dapit, ni mahimamat ang tanang katawhan.

Igo na nga gipasundayag nga may espesyal nga luna sa iyang kasingkasing ang mga biktima sa labing bangis nga katalagman ug ang labing kabos nga katawhan. Angay natong panghinauton nga magmalampuson ang iyang gipasiugdahan nga dagko ug radikal nga kausaban pagpaduol sa simbahan ngadto sa katawhan. Di sayon ang mga hagit sa iyang liderato gikan sa sud ug gawas sa Vatican. Apan uban sa pangaliya sa katawhan di siya mapakyas.  [email protected]