EDITORYAL - Ang pag-angkon ni VM Labella sa kausik sa buhis

Tinuod  ang  pag-usik-usik  sa city  hall  sa buhis sa katawhan nga  usa ka  salawayong  buhat.

Matud  pa  ni  VM Edgardo Labella  nga  nagsilbi  kanila  nga eye  opener  ang  mando  sa taga  COA  nga  ipadaginot    ang  buhis  sa katawhan.

Kay  ngano,  wa ba  sila  batia  og  kaikog  sa ilang  gihimo  nga  pagwaldas    sa kuwarta  nga  di  ilaha.

Usa  ka  pangabuso  ug  pagpakauwaw  sa  bahin  sa  mga  opisyal  ug  kawani  sa kagamhanan  kinsa  maoy  gipiyalan  sa publiko sa paggamit  sa buhis  sa katawhan.

Ang  buhis  dako  kaayo  og  kaakohan  sa pagpatubo  sa usa  ka  lugar  ug  sa pagpalambo  sa panginabuhi  sa katawhan.

Ang  pagpaanindot  sa usa ka dapit  pinaagi  sa  mga  maayong  mehora  nga  gastohan  sa kuwarta  ug  buhis  sa katawhan,  usa  sa  dakong  papel  ning  maong  kuwarta  sa   mga  tawo.

Pinaagi  sa buhis  dako  kaayo  ang  ikatabang  niini  sa pagsuperbisar  sa  mga  lugar  diin  nagkinahanglan  og  karsada,  drainage system, paghinlo  sa basura  ug  uban  pa.

Apan  unsa  bay  limitasyon  sa  mga  opisyal  sa gobiyerno  nga gipiyalan  sa  pag-atiman  niining  buhis?

Anaa  kini  sa utok   ug  sa  mga kamot  sa  mga  lider  kun unsay  ilang  gastohan  ug  unsaon  nila  sa paggasto  ang  maong  salapi.

Kun  matan-aw  nila  nga way  problema  sa  ubang  mga  gastohanan,  aw naa  sa mayor  kun  hutdon  ba  sa usa ka  proyekto  ang  kuwarta  nga daginoton.

Apan  sa usa  ka  gobiyerno  sama  sa dakbayan  sa  Sugbo  kinsa  nag-ilaid  usab  sa  nagkalainlaing  gastohanan,  di  baya  maayong  paminawon  nga  mogasto  og  taga-liog  ang  seminar,  training  sa mga  kawani.

Kay  ngano ba  nga  miabot  man  sa P11 milyones  ang  gasto  niini?  Unsa  ba  ka  importante  ang  maong  seminar  alang  sa mga  kawani  ug  opisyal  sa kagamhanan  sa dakbayan.

Human  sa maong  seminar,  unsa  may  resulta  sa  mga  kawani,  nagamit  ba  nila  ang  tanan  nilang  nakat-onan  alang  sa kaayohan  sa  kalamboan  sa dakbayan?