Dili g’yud mokompiyansa

Gisugdan kaniadtong Disyembre 16 ang tradisyonal nato’ng pagpangandam sa Pasko nga mao ang Misa de Gallo.

Daghan kanato ang nagpanon sa simbahan aron pagsimba. Gani sa akong tan-aw walay paghubas ang mga tawo sukad pa sa primero’ng adlaw hangtud gahapon. Ang inyong kabomberohan pabiling alerto karong holiday season. Aron hingpit kita nga luwas sa sunog sa atong pagpangandam ug hangtud na sa atong pagsaulog sa Pasko mas maayo siguro nga atong sundon ang mga pahimangno.

1. Sa inyong pagbiya sa panimalay sa sayo’ng kaadlawon aron mosimba, isiguro ninyo nga   maibot o ma-unplug ang tanang dekuryente nga appliances.

2. Mas labing maayo og e-off na lang ang plangka aron hingpit kita nga luwas sa sunog nga mamugna unya sa atong pagpabaya sa atong mga electrical appliances.

3. Kun atong ibilin ang atong kabataan, isiguro g’yud nato nga dunay hamtong nga atong mabinlan.

4. Palonga ang mga kandila o lampara nga gibotang sa altar sa dili pa kamo mobiya sa panimalay.

Pipila lang kini ka pahinumdom apan kun inyong hatagan og pagtagad mahimo kini nga makalikay kanato sa sunog. Sa kataposan, sa ngalan sa among regional director sa BFP 7 Senior Supt. Ma. Luisa C. Hadjula ug sa kinatibuk-ang kabomberohan… Merry Christmas and a Happy New Year kanatong tanan. Unta nga luwas kita sa sunog sa atong pagsaulog sa Pasko ug pagsugat sa Bag-ong Tuig.

* * *

Nagmalampuson ang gipahigayon nga ika-41 nga Bureau of Fire Protection (BFP) Recognition Day diin gihatagan Og pasidungog ang mga bombero nga maayo’g serbisyo.

Nahimo’ng guest of honor and speaker sa maong programa si Deputy Ombudsman for Visayas Paul Elmer Clemente diin gidasig g’yud niya ang kabomberohan sa pagkamatinud-anon ug dili magligoyligoy sa panerbisyo. Sa tanan nga awardees karong tuiga, Congratulations for a job well done.