Maghuwat lang ta
Sa nahabilin nga dawatunon nga P5 mil sa matag senior citizen sa dakbayan sa Sugbo niining tuiga, P3 mil ray iuna paghatag niining buwana. Ang kuwang nga P2 mil unya na kuno sa ikaduha nga semana sa Enero.
Mao gihapon kini ang nahitabo sa miagi’ng tuig nga giimpasan og bayad sa City Hall ang mga tiguwang niadto nang milabay’ng Enero ning tuiga.
Husto ang gisulti ni Konsehal Margot Osmeña nga unta kay maglisud man ang kagamhanan sa paghatag sa maong kantidad, maayo pa lang unta nga wala na lang pasaligi ang mga edaran.
Kasagaran ra ba sa mga edaran o senior citizen, mga ginikanan, uyoan ug apohan sa atong mga magbabalaod sa siyudad ug bisan sila nga mga konsehal nabalaka usab kay dili baya kuwartahan ang tanan nilang kaliwat.
Apan bisan kun kuwartahan daghan man kanila nga mokubra gihapon niini’ng maong benepisyo.
Wala na ra ba makadungog ang mga senior nga may umento pa sa sunod tuig ang ilang dawatunon, ilabi na nga wala’y election sa 2015.
Ambot lang kaha sa piniliay sa 2016, daghan baya nga naglaum nga basin himuon na nga P15 mil o P20 mil ang maong dawatunon sa mga senior matag tuig.
Aw hinuon wala kita masayud, basin ang umaabot nga mayor sa Cebu City sa 2016, may diskarte alang sa mga senior citizen ning dakbayan. Ato lang kining paabuton aron ang mahimo’ng mga senior sa matag tuig, makatilaw ning mag-umentong grasya gikan sa siyudad.
* * *
- Latest
