Ka way buot sa LTFRB

Usa ka semana nang gilaslasan og P1 ang minimum nga plitehan sa public utility jeepneys (PUJs) sa Metro Manila ug kasilinganang mga lalawigan. Biyernes pa sa niaging semana nga gipatuman sa Land Transportation Franchising and Regulatory Board (LTFRB) ang pasiunang us-os samtang gituki ang mga merito sa petisyon alang sa mas permanenteng pagpaubos sa plitehan. Usa ka semana nang naglaway ang mga pasahero sa Sugbo, Central Visayas ug ubang bahin sa Pilipinas sa us-os sa plitehan nga di gyud unta angay’ng ihikaw gikan nila. Nabiktima lang sa technicality--may buwag nga petisyon nga nangayo og mas gamay’ng us-os sa plitehan nga gipasaka sa rehiyonal nga buhatan sa LTFRB sa Sugbo.

* * *

Nagsugod ang binuang sa ulohang buhatan sa LTFRB. Wa gyud untay sukaranan silang Tsirman Winston Ginez ug kaubanan nga mupalabi sa Metro Manila kay sa Sugbo ug ubang mga lalawigan sa Kabisay-an ug Mindanao. Kay ang dakong tidlom sa presyo sa lana--nga dul-an na sa katunga kun itandi sa labing taas nga presyo niadtong Hunyo--dungan nga gipatuman sa tibuok nasud, di lang sa kaulohan. Ang petisyon ni Kongresista Manny Iway sa Negros Oriental wa itumong alang lang sa Metro Manila. Si Iway nipasabot sa DYAB Radyo Patrol nga wa siya mopasaka sa petisyon aron hikawan sa us-os sa plitehan ang mga pasahero sa iyang kaugalingong distrito.

* * *

Di makiangayon ang pagtulisok sa LTFRB sa buwag nga petisyon ni kanhi Cebu City Councilor Jun Pe, nga nangayo og mas gamay’ng P0.50 nga us-os sa minimum nga plitehan sa Sugbo ug Central Visayas, nga maoy hinungdan sa kalangay sa us-os sa ubang bahin sa nasud. Kun nahibawo pa si Pe nga ang iyang petisyon makapalangay lang sa proseso wa na lang unta siya maghasol. Apan bisan pila pa ka petisyon ang gipasaka human sa orihinal nga petisyon ni Iway, di mapapas ang kamatuoran sa dinaliang panginahanglan pagpaambit sa mga pasahero sa dakong kaayuhan sa pagtibugsok sa presyo sa lana.

* * *

Kun may igo pa lang kabuot silang Ginez ug kaubanan tibuok nasud unta ang ilang gipahamtangan sa provisional nga P1 nga us-os sa plitehan. Gawas lang kun makamatuod sila nga may PUJ drivers ug operators sa ubang lalawigan nga wa makatilaw sa mas baratong lana. Igo na lang natakdan sa pataka sa nasudnong liderato ang lokal nga mga opisyal sa LTFRB. Kinsa sa wa pa mupahigayon og public hearing sa petisyon ni Pe nirekomendar nang daan og P0.50 nga provisional nga us-os sa minimum nga plitehan. Apan nagpaabot nga mahuman ang public hearing una ipada ngadto sa ulohang buhatan ang rekomendasyon nga naumol na sa wa pa makadungog og bisan unsang argumento pabor ug supak sa petisyon ni Pe.