Misa de Gallo

Nagsugod karong adlawa ang mga Misa de Gallo sa lainlaing simbahan. Hangtud kini sa Desiyembre 24. Usa ni sa atong matawag nga “onli n d pilipins” kay wa man ni sa ubang nasud sa kalibutan.

Ingon man, usa usab kini sa daghan nato’ng mga religious traditions, sama sa pagsaulog sa fiesta, nga dili na gayud mapahunong. Gani, sa nangagi’ng mga Misa de Gallo, (dili ni Simbang Gabi), ning panahon sa kabag-ohan, daghan man gihapon ang manimba sa kaadlawon, lakip na ang mga batan-on.

Duna ko’y amigo nga sa akong tan-aw, dili matawag nga relihiyuso, apan, matud niya, ang Misa de Gallo iyang gihimo’ng devotion matag tuig, pagsakripisyo, bayad sa kasal-anan nga nahimo sa tibuok tuig, ug pasalamat sa mga grasya nga nadawat, despite sa iyang pagka-makasasala.

Dili niya sipyaton ang siyam ka kaadlawon, kay alang niya, dili kompleto kun lat-angan bisa’g usa lang ka adlaw. Unya, mga Misa g’yud sa alas 4, dili alas 5 kay matud niya, buntag na, ug wala nay igong sakripisyo nga mahimo.

Ang Misa de Gallo, gisugdan sa mga Katsila dinhi sa atong nasud niadtong 17th century ug hangtud karon, ato gihapon nga gi-practice.

Ang mga Misa sa kaadlawon gisaulog, inigtuktogaok g’yud sa mga manok, aron paghatag og higayon sa mga mag-uuma pagsimba sa dili pa sila mag-uma.

Mao ni nga ginganlan og “Mass of the Rooster.” Lagmit alang sad ni sa mga sabungero, dili kay sa mga mag-uuma lang.

Anyway, alang sa mga Katoliko, usa kini sa mga gimbuhaton sa Advento, kon pagpaabot ug pagpangandam sa pagkatawo sa Manunubos. Ug kun maghisgot ta’g Christmas, walay Christmas, kun walay Mahal nga Birhen.

Kay bisan og gipaagi pa’g test tube ang pagkatawo ni Jesus, muagi man gihapon sa babaye.

Busa, ang Misa de Gallo pasidungog usab sa Mahal nga Birhen, pasalamat nga misugot siya nga mahimong Inahan sa Manunubos.

Imagine kun mibalibad pa si Maria ... unsa man?

* * *

Mag-public hearing pa kuno kun angayan ba nga kunhoran ang plite sa mga sakyanan publiko. Ngano’ng mag-public hearing pa man? Di ba maka-decide ang LTFRB kun angayan ba’ng us-osan ang plite, gumikan sa dako’ng pag-roll back sa presyo sa gasolina ug ubang mga produkto sa lana? Siyaro.

Ipaagi pag public hearing, aron dunay mosupak? Unya, kaayohan man sa lungsod ang tumong sa public hearing, kinsa man sa mga lungsoranon ang mosupak? Bisan gani ang mga operator mismo mauwaw tingali’ng mosupak.

Di ba mahimo nga estoryahan na lang ang mga operator, pangutan-on kun pila’y ilang gusto’ng imenos sa plitehan? Di na lang i-public hearing, after all, waa may public nga mosupak niini.