EDITORYAL – Hagit sa mga tax collectors

Kinahanglan nga molihok g’yud taman sa ginhawa ang mga tax collectors sa dakbayan sa Sugbo kay ang Cebu City Council molugak sa ilang tugot ug hatagan og dako-dako nga budget ang siyudad para sa sunod tuig.

Dili man tuod matuman ang P19.1 Bilyones nga budget nga gisugyot ni Mayor Michael Rama pinaagi sa Local Finance Committee, apan sa una’ng higayon makaangkon si Mayor Rama og dako kaayo nga budget.

Daghan ang nagtuo nga mapalpak gihapon si Mayor Rama sa iyang pangandoy kun ang mga tax collectors sa dakbayan padayon gihapon sa ilang pagmika sa trabaho.

Karong tuiga lang nga P5.8 Bilyones ra ang budget sa dakbayan layo pa kaayo sila ug sigurado nga dili makaabot sa mao nga kantidad ang nakolekta nga buhis, apil na gani ang Internal Revenue Allotment (IRA).

Mag-unsa man ang dako nga budget kun dili kini masuportahan og kuwarta aron mapatuman ang mga proyekto nga giplano alang sa katawhan?

Si Mayor Rama mahisama lang unya kini sa usa ka tawo nga dako kaayo og pangandoy nga makapatuman og proyekto apan walay mahimo kay wala may kuwarta nga magasto para niini.

Kun pili-pilion ra gani sa City Hall ang pagpangolekta og buhis makuli nga makakolekta sila og dako nga kantidad nga masuportahan nila ang bilyon-bilyon ka pesos nga budget para sa sunod tuig.

Mentras karon pa lang angay’ng daan  molihok na ang mga tax collectors.