Namatay sa paggamit sa ilegal nga drugas

Ang  gibaligya nga mga produkto nga ginama sa dagkong pabrika nagkinahanglan gayud nga ipaila ang kaanindot  aron sa pagkabig sa mga tawo sa ilang pagtagad ug  mokusog usab ang halin niini.

Dagkong salapi ang magasto sa mga negosyante nga maoy nanag-iya sa maong produkto nga dili lamang nila igsapayan tungod kay ang bugti usab mao man ang kusog nga halin sa gibaligya nila nga bag-ong produkto.

Kini maoy sagad nga gihimo sa mga negosyante nga nagbaligya og nagkadaiyang herbal nga ang ilang kaepektibo maoy atong mabati nga gipahibalo sa mga commercial sa radio, television o mga adds sa mga pamantalaan. Matud pa nila nga dako kaayong sukwahi sa ilegal nga drugas nga naglakip sa shabu, marijuana nga  nailhan sa mga adik sa paggamit nga dili sa commercial sa radio o television kun dili pinaagi lamang sa mga hunghong sa  ilang mga  higala nga nagumon na sa paggamit niini.

Daghan na ang nalambigit sa paggamit sa maong matang sa ilegal nga drugas nga higpit gayud nga gidili sa atong kagamhanan sanglit makahatag kini og dautang epekto sa panglawas sa mogamit nga mga tawo. Daghan na ang nag-ingon nga ang mga nagkadaiyang krimen nga nahitabo sa atong katilingban nga naglakip sa pagpanglugos, pagpatay o mga paghikog  maoy usa sa mga nag-unang hinungdan ang pagkagumon sa paggamit sa ilegal nga drugas. Adunay mga gikataho nga paghikog nga pag-ambak sa Mactan Mandaue Bridge o Marcelo Fernan Bridge nga gituohan gihapon sa  kapolisan nga ang pagkagumon sa  ilegal nga drugas maoy nag-unang mga  hinungdan niini.

Ang mga batid  sa panglawas moingon nga tulo lamang ang tataw nga padulngan sa mga nagumon sa paggamit sa ilegal nga drugas kun ugaling dili man gayud kini mapakgang sa labing dali nga panahon. Ang unang padulngan sa nagumon sa paggamit sa ilegal nga drugas mao nga madakpan kini sa kapolisan ug  mabalhog sa bilanggoan,  maaksidente sa dalan kay nawad-an na sa maayong panghunahuna o mamatay tungod sa paggamit sa ilegal nga drugas.