Kuwarta sa Sinulog
Abli o sirado. Mao kini ang kahimtang sa nawagtang nga daw aso nga P1.7 milyones nga pundo sa Sinulog kaniadtong 2012.
Si Sinulog Executive Director Ricky Ballesteros miingon nga kun may bag-o nga mga saksi ug ebidensiya nga motumaw, puwede ra nga ablihan pag-usab ang maong kaso.
Apan kun wala na g’yuy moutingkay sa maong kaso, aw, babay na lang. Total dili man to gikan sa bulsa sa mga nagpasiugda sa Sinulog.
Sa Tapok-Tapok sa Media sa Sugbo didto sa Cebu Business Hotel, gitug-an ni Ballesteros nga nawala ang maong kantidad sulod sa cabinet sa opisina sa Sinulog nga nahimutang ilawom sa grandstand sa Cebu City Sports Center nianang mga takna human sa kasaulogan sa Sinulog kaniadtong 2012.
Nagtuo siya nga nahitabo ang pagkawat sa maong salapi lapas na sa ala-1:00 ang takna sa kaadlawon, kay mibiya siya gikan sa opisina niana man nga oras.
Pagbalik niya pagkaugma, Lunes sa buntag, mga polis ug taga media na maoy mipahibawo niya nga nawagtang na ang P1.7 milyones nga cash. “Maayo na lang kay nakalakaw na ko kay kun didto pa ko ug naengkuwentro nako ang kawatan, wala ko masayud kun buhi o patay na ba kaha ko,” matud pa ni Ballesteros kay matud niya nga andam siya nga mobuhis sa kinabuhi pagpanalipod sa maong kantidad.
Human isang-at sa kapolisan ang “Robbery Case” batok sa guwardiya nga maoy on-duty niadto’ng higayona, gibasura sa korte ang kaso kay wala’y mga saksi ug mga ebidensiya nga siya gayud ang nagkuha sa kuwarta.
* * *
- Latest
