Mamili ra’g kolektahan

Klaro kaayo nga wala magtug-an sa tinuod si Mayor Michael Rama diha’ng miingon siya nga dili niya igsapayan nga ang mga tax collectors wala makakolekta sa kantidad nga katumbas sa Annual Budget karong tuiga.

Makadaghan gibalik-balik sa mayor nga ang dakbayan sa Sugbo nagkantidad og P20 Bilyones o labaw pa gani matag tuig kun ang mga tax collectors maninguha lang g’yud pagkolekta’g buhis.

Apan unsaon, pili-pilion ra man nila. Tiaw mo, miabot sila didto sa akong payag nga nahimutang sa ibabaw sa bukid pagdemanda nga bayaran na ang buhis sa akong gipuy-an.

Apan daw mga buta sila nga wala makakita sa mga dagko’ng balay nga diha sa ubos nga bahin nga ila ra’ng giagian. Mao kana ang rason nga gamay ra sila og makolekta kay pilion ra man nila ang kolektahan. 

Mahimo usab nga sabton kini nga gi-“single out” ko nila sa pagtungas sa bukid aron pabayron og buhis kay gasigi man ko og hisgot nga hinay ang mga tax collectors sa ilang trabaho sa pagpangolekta.

Walay problema nga pabayron ko og buhis apan dili kay pili-pilion lang. Tingali makasabot niini ang mga tax collectors kana kun husto pa ang ilang pangisip.

Sa ako na nga giingon, andam ko nga mobayad sa gipaningil nga kapin sa P2,400 nga real property tax sa akong payag, apan mangutana ko kun ngano nga ako ra man ang ilang gikolektahan?

Bisan pa og magkuyog mi sa mga tax collectors diri sa among dapit sa Barangay Apas, akong imatuod kanila nga wala nila kolektahi og buhis ang mga tag-iya sa dagko pa nga mga balay.

Unsa, suwayan nato? Ang tinuod, husto g’yud si Mayor Rama sa iyang pamahayag nga dako kaayo ang makolekta nga buhis sa dakbayan sa Sugbo kun maayo lang mangolekta ang mga tax collectors.

Apan kun ila lang gani nga pili-pilion ang kolektahan, kadto lang mga tawo nga sa tan-aw nila ilang madaug-daog, kanunay nga bati kaayo sila og performance.

Diha’ng gisukna nako si Mayor Rama kun kontento ba siya sa serbisyo sa mga tax collectors, wala siya mohatag og kumentaryo. Apan kun basehan nimo ang una niya nga pamahayag nga ang dakbayan sa Sugbo nagkantidad og P20 Bilyones nga buhis matag tuig, klaro kaayo nga wala siya malipay sa lihok sa mga tax collectors.

Dili ba mayor?