Pamalandong matag Domingo Sa tumang pagpaubos

Kun buot hunahunaon, mahimo gyud unta nga ibutang ni Juan Magbubunyag ang iyang kaugalingon sa sapatos sa usa ka mesiyas. Apan wala ni niya himoa sanglit sayud man siya sa iyang bokasyon ug tahas. Siya ang Precursor kon ang Mag-uuna sa Mesiyas. Wala niya paburota ang iyang kaugalingon ginamit ang maong kahigayonan diin ang mga tawo adunay dakong pagtuo ngadto kaniya. Dili makapahimo natong ubos kun kita moangkon sa matuod. Kuyog niini ang pag-angkon sa atong mga kahuyangan ug kakulangan. Ning nagsingabot nga Pasko sa pagkatawo sa atong Ginoo, atong igasa kaniya ang usa ka mapaubsanong espiritu ug mahinulsolong kasingkasing. Kini ang mas bililhon sa tanang gasa, kini ang mas gikinahanglan sa tanang mga gasa.