Kuneho; Temang nalambigit: Mga anak, pagkamabination, kapaspas

Sa nagkadaiyang mga kultura, ang kuneho simbolo sa usa ka taguangkan nga mabungahon. Nabantog ang kuneho nga dali ra kaayong mosanay. Sa laing bahin ang kuneho mabination ingon man paspas sa mga panglihok-lihok niini. Kun kini ang nigawas nga imahen sa imong damgo, mahimong kabahin sa imong mga kabalaka ang dakong tinguha nga mamahimong ginikanan unta sa daghang kabataan. O dili ba nahimong hinay alang kanimo ang dagan sa imong aktwal nga pagkinabuhi nga tungod niini buot nimong mopaspas ug magdali apan maglisud ka sa paghimo sa ingon. Usa kini ka pagdapit alang kanimo nga kinahanglan nimong butangan og igong pwersa ang imong mga paningkamot.