Tubaga lang

Si Bobby Nalzaro wa sa tukma nga argumento. Ako siya nga gikiha sa korte tungod kay namakak siya sa iyang pag-ingon nga gihimo-himo lang nako ang mga ebidensya sa 38 ka kaso nga akong gipasaka batok ni Cebu City Treasurer Diwa Cuevas.

Apan si Nalzaro dili makatudlo kun hain sa mao nga mga kaso nga giingon niya nga gibuhat-buhat ra nako ang mga ebidensya. Kun makaprobar siya nga adunay mga ebidensya nga gihimo-himo lang, isibog dayon nako ang kaso batok kaniya.

Gusto nako nga iprobar ngadto sa katawhan nga dakong bakak ang pamahayag ni Nalzaro tungod kay ang mga kaso gibase kini sa findings sa Annual Audit Reports sa Commission on Audit.

Ngano’ng ako maoy mipasaka og kaso ni Cuevas? Unom ka buwan ang nakalabay, nangutana ko ug gitug-anan ni COA Commissioner Rowena Guanzon nga gamay ra kaayo sila og mga abogado.

Matud sa COA nga kun adunay complainant nga mopasaka og kaso, ang COA andam nga moatubang sa korte ug mosuporta batok sa hingtungdan. Ang mga Sugbuanon dili ba diay interesado nga masayod kun unsay nanghitabo sa kuwarta sa dakbayan?

Kinsa ang nagsulti sa tinuod? Wala ba kamo mahibulong ngano’ng wala nay kuwarta para sa mga senior citizens, para sa city scholars bisan anaa kini sa annual budget?

Karon si Nalzaro mura’g nagpasabot nga dili siya sad-an sa kaso’ng libel kay wala ko’y trabaho, nga 22 na ka kaso’ng libel ang iyang giatubang ug wala pa makonbikto, nga naluoy lang siya sa city treasurer ug nga personal ang rason sa akong pagpasaka og kaso.

Akong giawhag si Nalzaro nga mohunong na sa paghimo og “spider webs” ug “inverted pyramid” aron paglingla sa kaisipan sa publiko.

Tubaga kun hain sa kaso nga akong gipasaka kang Cuevas nga gihimo base sa tumo-tumo nga ebidensya.