EDITORYAL - Kun “unli,” unlimited g’yud unta

Daghan nang mga Pilipino ang nagbaton og mga android phones o kadtong mga cellphones nga dunay internet capability o access. Baratohon man o kadtong mga high-end androids basta ang importante maka-konektar sa internet.

Tungod niini, ang mismong mga telecommunications companies pa maoy susama og nag-advertise sa kanindot sa matag brand o modelo nga maka-access sa unsay uso o trending karon sa net.

Dungan niini ang pagbaligya usab sa ilang produkto ug serbisyo prepaid man o plans. Usa niini ang bulatik bahin sa “unlimited calls, text, ug internet.”

Apan ang Department of Justice (DOJ) nakadawat og daghang mga reklamo bahin sa bakak o pangilad nga gipanghimo sa mga telecommunications companies ngadto sa mga konsumidor bahin anang “unlimited internet access” promos.

Tinuod way sayop kun mo-advertise ug mo-promote sa usa ka serbisyo kay aron usab mokita ang mga telcos, apan kun unlimited unta, kinahanglang unlimited gyud nga internet access sa subscribers o konsumidor.

Kay kung limitado, ayaw  na lang butangi og “unlimited” kay usa kini ka matang sa pagpangilad, ang tawo mopalit man gyud kun ilaha kining kinahanglan, apan madismaya na lang kun ilang madiskubrehan nga dili diay mahatag sa maong saad ang ilang gipangita.

Gawas sa mga android phones, dunay mga users nga migamit og mga broadband alang sa ilang computers ug laptops, apan  kun mabantayan nilang kusog ang paggamit sa usa ka user sa internet, limitahan ang gipaspason niini.

Hangtud nga mahurot na lang ang load sa sige pinaabot sa site nga giablihan hinungdan nga mapugos ang user pagpa-reload. Wala kini hisguti sa ilang advertisement.

Ang DOJ mipagawas na og advisories ngadto sa mga telcos bahin niini aron protektahan ang mga konsumidor niining pagpangilad. Ang pangutana, motuman ba kaha ni sila?