Binay hayan mosunod ni Villar
Padayon ang pagtiurok sa kasikat ni Bise Presidente Jejomar Binay. Kini’ng tanan mugna sa pasangil nga pagpangurakot nga gipasangil batok kaniya.
Sigun sa atong nakita, kun unsa kakusog ang pagsaka sa pagka sikat ni Binay kaniadto, mao usab kini karon ang gikusgon sa pagtiurok sa iyang pagka sikat.
Base sa resulta sa gihimo’ng pagtuon sa Pulse Asia kaniadto’ng Nobiyembre 14-20 nagkadaghan ang mga Pinoy nga dili na mobotar ka’ng Binay pagka presidente sa tuig 2016 tungod sa ilang pagkadismaya sa pagkalambigit sa kurapsyon.
Gikan sa 31 porsiyento nga puntos nga iyang nakuha kaniadto’ng Septiyembre, ang kasikat sa bise presidente mitiurok ngadto sa 26 porsiyento na lang.
Ang buot ipasabot niini, tulo sa matag upat ka pinoy ang dili gusto nga mahimong presidente sa nasud si Binay o 75 porsiyento kanila ang dili gusto nga siya ang mopuli ni Presidente Noynoy Aquino sa Malakanyang.
Sa pagtiurok sa kasikat sa bise presidente dili lang ang Pulse Asia ang nagsulti niini. Ang Social Weather Stations mitaho usab. Sa Septiyembre 26-29 ning tuiga nga pagtoon, 15 porsiyento ang gidaghanon sa mga wala na mosalig ni Binay.
Kamo nga wala maapil sa gipangutana sa SWS ug Pulse Asia, iboto ug motuo ba gihapon mo ni Binay? Sa atong nakita karon, dili kaha mahimo’ng ikaduha’ng Manny Villar si Jejomar Binay?
- Latest
