EDITORYAL – Pangolekta’g buhis pinili

Giangkon na g’yud ni Cebu City Acting Treasurer Diwa Cuevas nga hayan dili makolekta sa iyang mga tax collectors ang kantidad nga mosuporta sa P5.8 Bilyones nga budget karong tuiga.

Nagpasabot kini nga daghan usab nga gihan-ay na nga mga proyekto ang dili mapatuman kay wala may budget. Pagka Nobiyembre 30, miabot lang og P4.7 Bilyones ang budget.

Sa ato pa, sa buwan sa Disiyembre kinahanglan nga ang mga tax collectors mokolekta og P1.1 Bilyon aron nga mapundohan nila ang P5.8 Bilyones nga budget nga giaprobahan sa mga konsehal.

Gisugyot gani unta ni Mayor Michael Rama nga P6.7 Bilyones ang ipagahin nga budget karong tuig. Mosamot nga makapangutana ang katawhan kun makolekta kaha sa mga tax collectors ang P19.1 Bilyones nga gisugyot sa mayor para sunod tuig?

Daghan kaayo’ng buhis nga angay’ng kolektahon apan wala kini himoa sa mga kawani sa City Hall. Sa laktud, pilion ra sa mga kawani sa City Hall kun kinsa ang ilang kolektahan.

Tingali kun mga higala ug kaila sa mga opisyal sa City Hall dili nila kolektahan kay maikog.

Sama sa mga tax collectors nga mihatod gayud og demand letter alang sa real property tax ngadto sa tag-iya og usa ka gamay’ng balay nga atua mahimutang sa bukid sa Barangay Apas, apan gilabyan lang ang mga dagko nga balay nga diha sa ubos.

Makatarunganon ba ang ilang gihimo? Unsa man diay ang pagpangolekta og buhis, pili-pilion lang? Mao kana ang hinungdan nga bisan daghan ang kolektahan og buhis, dili sila makaabot sa ilang target income.