Gihasol g’yud ta ni Ruby

Tungod sa nakat-onan sa bagyo’ng Yolanda, ang mga opisyal sa nasudnon ug lokal nga kagamhanan sa 47 ka lalawigan sa nasud nga giagian sa bagyo’ng Ruby wala na g’yud mokompiyansa.

Ang tanan naniguro ug naningkamot nga wala g’yuy kinabuhi’ng makalas ug dili kaayo dako ang ibilin nga kadaot sa bagyo ngadto sa mga tanom ug kabtangan.

Tungod niini, pipila ka higayon nga gisuspenso ang klase sa mga tunghaan ug ang trabaho. Gidasig usab sa mga opisyal sa kagamhanan ang tagdumala sa mga pribado’ng buhatan sa pagpapauli og sayo sa ilang mga empleyado aron dili maabtan sa bagyo ug dili mababoy sa kadalanan tungod sa posible’ng pagbaha nga mugna sa uwan nga dala sa bagyo.

Samtang ang mga lokal nga opisyal gikan sa barangay ngadto na sa lalawigan nagtukaw usab aron mabantayan ang kahimtang sa mga molupyo nga nanglalin sa mga evacuation centers.

Kami lang sa Barangay Quiot, 24 oras nga walay tulog-tulog pinangulohan sa among kapitan nga si Francis Espares, kini’ng ubos ninyong alagad, ug mga barangay workers.

Halos walay pahuway ang tanang kawani sa among barangay. Gikan sa pagpamutol sa mga sanga sa kahoy, paglimpyo sa mga kanal, pagpahiluna sa mga namakwit, pagpamutos sa mga relief goods ug pagpanghatag niini ngadto sa mga namakwit.

* * *

Ang nasudnong kagamhanan klaro nga nakakat-on sa pagbisita ni Yolanda mao’ng wala na sila magpaluya-luya. Si DILG Secretary Mar Roxas personal ug nangunay g’yud sa pag-supervise sa mga opisyal sa lokal nga kagamhanan sa Eastern Visayas nga didto mitugpa ang bagyo.

Kun imong sumadahon, kahasol ang gihatag ni Ruby kanato dinhi sa nasud. Pero maayo na lang ning mahasol ta sa pagpangandam sa pag-abot sa bagyo kay sa mahasol ta sa pagpalubong sa mga namatay sa bagyo tungod sa kakuwang sa atong pagpangandam.