EDITORYAL – Mag-alerto kita kanunay

Maayo g’yud nga makapangandam kay bisan og moigo pa ang bagyo  sa usa ka lugar, unya dili lang kaayo kusog, malikayan ang mga kadaut ngadto sa atong kabalayan.

Adunay kabalayan nga dili kaayo lig-on gipangbantingan og mga dagko’ng alambre ug pisi nga gigaid sa punoan sa dagko’ng kahoy sa ilang palibot. Ang mga kahoy gipangpul-ongan og mga sanga.

Kadtong mga balay nga apupa kaayo sa paghuros sa hangin  gipangtaptapan ang palibot aron nga kun mohuros na ang hangin nga adunay kauban nga uwan dili makasulod ang tubig sa sulod.

Apan labaw sa tanan mao nga kadto’ng mga pamilya nga nagpuyo daplin ug ibabaw g’yud gani sa dagat, ingon man daplin sa kasapaan, sayo kaayo nga namiya sa ilang kabalayan.

Bisan tingali og mikuso-kuso pa ang bagyo’ng Ruby dinhi sa dakbayan ug sa ubang mga dapit sa Sugbo, tingali menus ra ang mangamatay kay nakapangandam na man daan ang katawhan.

Tukma g’yud nga ang katawhan mohimo kanunay og pagpangandam kay sa paghimo niini magkahulogan nga malikayan ang dugang kadaut nga mamugna tungod sa katalagman.

Usa ka leksyon ang nahitabo sa bagyo’ng Yolanda nga ang katawhan wala mangandam ug resulta daghang kinabuhi ang nakalas.

Ang makanunayon nga mahimatngon sa kabomberohan ug mga sakop sa Local Disaster Risk Reduction and Management Office nakatabang gayud pag-ayo aron maedukar ang katawhan sa paglikay sa katalagman.

Busa, sukad karon angay’ng kanunay kita’ng andam sa tanang higayon batok sa katalagman nga matag karon ug unya mohulga kanato.