Pamalit sa PNP chief italaga agad

KAUNA-UNAHAN ito na nagsuspindi ang Ombudsman ng hepe ng Philippine National Police dahil sa katiwalian. Mahaba ang anim na buwang sapilitang pag-alis kay Director General Alan La Madrid Purisima at 17 pang PNP officers. Bago pa ang utos ng Ombudsman, lumalala na ang kriminalidad. Dapat magtalaga agad si President Noynoy Aquino ng pamalit. Kundi, lalo pang aabante ang mga kriminal at aatras ang pulisya.

Sinuspindi si Purisima dahil sa maruming kontrata sa delivery ng lisensiya ng baril sa mahigit 90,000 na aplikante. Suspendido rin si Chief Supt. Raul Petrasanta, PNP-Central Luzon regional commander, na hepe ng Firearms and Explosives Office nu’ng ipatupad ang kontrata.

Doble ang suspensiyon ni Petrasanta. Hiwalay pang anim na buwan siya tanggal dahil sa maanomalyang paglisensiya sa 1,004 AK-47 rifles bilang FEO chief. Napasakamay umano ng mga komunistang rebelde ang mga ito.

Matagal nang umalingasngas ang mga katiwalian. Pinanatili ni P-Noy sina Purisima at Petrasanta, na mga kaibigan niya. Si Purisima, Philippine Military Academy Class 1981, ang close-in security ni P-Noy sa ilalim ng nanay na President Cory nu’ng 1987-1992. Si Petrasanta, PMA 1984, ang hepe noon ng security sa bahay ng mga Aquino.

Nagretiro nu’ng Biyernes lang si PNP deputy chief for admin Felipe Rojas Jr.. Kasunod niya sa seniority lineal list sina deputies Leonardo Espina ng operations, at Marcelo Garbo na chief of staff.

Naka-heightened alert ngayon ang PNP dahil sa napi-pintong Super Typhoon Ruby. Bahagi ito sa paghahanda sa sakuna.

Matagal nang binabatikos si Purisima dahil sa dagsa ng mararahas na krimen. Umaangal sina anti-crime leaders Tessie Ang See at Dante Jimenez na dumami ang kidnappings for ransom at patayan sa kalye. Sa Kamaynilaan nauuso ang pag-kidnap at holdup sa mga bata.