Gimik ra diay
Mibalik na ang panagsuod ni Mayor Jonas Cortes ug Dr. Paulus Mariae Cañete, tag-iya sa Mandaue City College kinsa higpit nga managkaaway kaniadto.
Mura’g mibanagbanag na ang katumanan sa mga laraw nga si Cortes maoy magbise mayor ni Cañete sa 2016 elections nga dako og kahigayonan nga inigdaug sa maong tandem, mahibalik sa pagka-mayor si Cortes, kay si Cañete manaog man aron ipadayon ang pagdumala niya sa iyang eskuylahan.
Kun ma-bise mayor si Cortes sa mga Ouano o kaha Quisumbing, wala na siya’y paglaum nga mahimo pa’ng mayor pag-usab sa Mandaue tungod sa mga dagko’ng interes sa politika sa maong mga pamilya.
Si Cortes kun mag-kongresista sakaon kaayo alang kaniya ang pagdaog ug malagmit nga mawagtang siya sa hingpit sa mapa sa politika sa ika-unom nga distrito sa Sugbo.
Si Cañete nga giagak sa mga pamilya’ng Mendoza ug uban pa’ng pamilya nga tang-an sa politika sa ika-unom nga distrito, klaro kaayo nga maoy mahimo’ng mayor sa Mandaue sa umaabot nga election.
Gani sa sunod semana gitakda na nga buksan ang kaugalingo’ng radio station niini nga DYPC 91.78 kHs diin ang pagsubo niini tambongan sa mga inila nga tigpamaba ni PNoy nga si Herminio Coloma, Abigael Valte, Gov. Hilario Davide III, Mayor Cortes, ug uban pa kinsa suod ni Canete sa politika.
Ang pagbukas niini sugdan sa usa ka motorkada uban sa mga magsisibya sa radio, television ug reporter sa pamantalaan nga pulos ilado sa pagbalita nga gituohang maoy makapakusog ug makapalig-on pag-ayo sa kampanya’ng politikanhon ni Canete ug magsilbi’ng baruto sa iyang kadaugan.
* * *
- Latest
