Naalarma ka ba?

Kun usa ka sa minilyon ka Pinoy nga naalarma sa gitakda’ng pagsu’d ni super typhoon Hagupit nga adunay lokal nga pangalan nga Rubi, angay ka nga malipay.  

Sa atong pagkaalarma, magsugod ang pagpakabana ug pagsiguro sa seguridad. Ang imong pagkaalarma ang dugay na’ng gipangandoy aron nga mas maibanan ang grabe’ng kadaot sa bagyo nga mosu’d sa Pilipinas.

Ang imong pagkaalarma ang maghatud nimo sa kaluwasan ug kaandam sa panahon nga adunay nagdanga-danga nga bati’ng panahon. 

Ang imong pagkaalarma ang magduso nimo aron mangita og mga paagi aron nga mas andam ka sa pagsugat sa dili kapugngan nga panghitabo. 

Mokabat sa kapin 20 ka bagyo ang mosu’d sa Pilipinas sa matag tuig. Kinaon na nato ang bagyo nga halos matag buwan adunay duha nga manamastamas sa atong kabalayan, kabtangan ug kinabuhi.

Dili na bag-o ang maong matang sa kalamidad tungod kay kun ang katiguwangan ang pangutan-on, bisan sa ilang mga apohan ug apohan sa ilang apohan nakasinati na og mga bagyo.  

Dili na ‘sab bag-o ang pagkadanghag nato panahon sa ingon niini nga matang sa kalamidad. Sa kanunay ipadayag nato ang atong kahadlok.  Apan kaniadto maglisud kita sa pagtubag sa pangutana kun hingpit ba kita nga andam. 

Ang kakuwang sa gitawag nga ‘adaptability’ ang labing dako’ng problema dinhi sa nasud kun bagyo ang hisgutan.

Salamat sa bag-ong teknolohiya ug halos mahibaw-an na asa moagi ang bagyo ug unsay mga lugar nga maapiki. Tungod sa teknolohiya hapit na nato maapsi ang bagyo sa iyang rota nga sudlon. 

Apan dako’ng pakyas ning tanang teknolohiya kun wa’ gihapoy tataw nga pagpakabana gikan sa katawhan.

Kun magpabilin nga magpasagad lang ang mga tawo, klaro’ng wala g’yud diay ‘ta maleksyon gikan sa epekto ni Ruping ug Nitang ug ning bag-o, si Yolanda nga nagbilin og dako’ng kadaot.

Apan karon nga naalarma na ang katawhan ug nagsige og pangutana unsay ruta sa bagyo, kanus-a masinati ang bagyo ug unsay mga lugar nga magrabehan, timailhan lang sa mas hamtong ug andam nga katawhan.

Karon mas maayo’ng sakyan sa gobiyerno ang taas nga tinguha sa mga tawo kabahin sa lakat sa panahon aron magsugod na ang dugay na nato’ng gipangandoy nga ‘adaptability’ sa matang sa panahon nga atong kanunay nga masugatan matag tuig sa atong kinabuhi.

Sa mao nga paagi lang mahingpit ang tinguha nato nga makahaw-as gikan sa grabe’ng epekto sa agrikultura, kabalayan, kabtangan ug kinabuhi ang mga Pilipino. Kung naalarma ka sa umaabot nga bagyo, husto ka sa imong gibati.

* * *

Email: [email protected]. or [email protected].