Nalipay ang balikbayan

Ang mga senior citizens sa dakbayan gisaaran og cash aid sa City Hall. Usa ka Sugbuanong balikbayan kinsa mga 20  ka tuig na nga nanimuyo sa Amerika, dihang gipahibawo parte niini sa iyang apo, naka-ingon:

“Nindota na sa Sugbu no. Duna nay alawans ang mga tiguwang. Wa man ni kaniadto sa dinhi pa mi.”

* * *

Unya dihay balita nga iyang nabasahan sa mga mantalaan diin nag-ingon nga ang cash aid sa mga senior citizens dedakan og tag dos mil pesos isip donasyon kuno sa mga tiguwang ngadto sa pagpabangon kon reconstruction sa city hospital.

* * *

Nilingo-lingo ang balikbayan. “Unsa gud diay ni?” nangutana siya sa iyang silingan nga bag-o pang nahimong senior citizen. “Mora man ni’g hatag-bawi.” Nanghambog na kuno siya sa pagka-charitable sa kagamhanan sa siyudad sa Sugbu. “Nauwawan na ko ron ani,” matud pa niining atong balikbayan.

* * *

Apan nakabawi si Manang Balikbayan. Adtong miaging adlaw mipahibaw si Mayor Mike Rama nga wala’y didaksyon ang cash aid  nga ihatag ngadto sa mga senior citizens. “Seniors will get full amount,” matud niya. Gawas pa niana, ang mayor mipasalig nga ang tanang kantidad nga nahibilin sa financial obligation sa siyudad ngadto sa mga senior citizen ilang madawat sa 2015.

* * *

Kalabot niining balitaa, si Mayor Mike Rama mipahibawo nga ang Office of the Senior Citizens Affair (OSCA) duna nay bag-ong pangu sa dili madugay. Ambot kun duna ba ni kalabutan sa iyang gi-deny nga dedaksyon sa cash aid alang unta sa CCMC.

* * *

SA LAING BAHIN ... Daghang salamat sa mga magbabasa ning Banat News diha sa merkado sa Tabunok ug Minglanilla.